సోలార్ పవర్‌..ఉత్తరాఖండ్ మైలురాయి

పునరుత్పాదక ఇంధన రంగంలో ఉత్తరాఖండ్ చారిత్రాత్మక మైలురాయిని దాటింది. రాష్ట్రంలో స్థాపిత సౌర విద్యుత్ సామర్థ్యం 1 గిగావాట్ (1000 మెగావాట్లు)ను అధిగమించింది. తాజా గణాంకాల ప్రకారం మొత్తం సౌర విద్యుత్ సామర్థ్యం సుమారు 1027.87 మెగావాట్లకు చేరుకుంది. ఇది పరిశుభ్రమైన, హరిత ఇంధనంపై రాష్ట్రం చూపుతున్న నిబద్ధతను ప్రతిబింబిస్తుంది.

ముఖ్యమంత్రి పుష్కర్ సింగ్ ధామి ఈ విజయానికి ప్రధానమంత్రి నరేంద్ర మోదీ యొక్క గ్రీన్ ఎనర్జీ దూరదృష్టి కారణమని తెలిపారు. “ఆత్మనిర్భర్ భారత్” మరియు గ్రీన్ ఎనర్జీ లక్ష్యాల ప్రేరణతో ఉత్తరాఖండ్‌లో సౌరశక్తిని ప్రజా ఉద్యమంగా మార్చామని సీఎం పేర్కొన్నారు. కేంద్ర ప్రభుత్వ పథకాలు, రాష్ట్ర చర్యల సమన్వయంతో వేలాది యువకులు, స్థానిక పారిశ్రామికవేత్తలకు ఉపాధి అవకాశాలు లభించాయి.

ఉత్తర్‌కాశి జిల్లా డుండా బ్లాక్‌లోని మల్నా గ్రామంలో 200 కిలోవాట్ల చొప్పున 28 ప్రాజెక్టులు (మొత్తం 5600 కిలోవాట్లు) ఏర్పాటు చేయడం విశేషం. రాష్ట్రంలో 397 మెగావాట్లు గ్రౌండ్ మౌంటెడ్ ప్రాజెక్టుల నుంచి, 241 మెగావాట్లు రూఫ్‌టాప్ సౌర పథకాల నుంచి, 137 మెగావాట్లు ముఖ్యమంత్రి సౌర స్వయం ఉపాధి పథకం నుంచి, 110 మెగావాట్లు కమర్షియల్ నెట్ మీటరింగ్ నుంచి ఉత్పత్తి అవుతున్నాయి. అదనంగా కాప్టివ్ ప్లాంట్లు, కాలువలపై ప్రాజెక్టులు, ప్రభుత్వ భవనాలపై సౌర వ్యవస్థలు కూడా ఏర్పాటు అయ్యాయి.

Also Read:TG:26 నుంచి అసెంబ్లీ సమావేశాలు