అమెరికాలోని న్యూజెర్సీ రాష్ట్రంలో ఘోర విమాన ప్రమాదం చోటుచేసుకుంది. న్యూజెర్సీలోని హామన్టన్ ప్రాంతంలో రెండు హెలికాప్టర్లు పరస్పరం ఢీకొనడంతో తీవ్ర విషాదం నెలకొంది. ఈ ప్రమాదం ఒక్కసారిగా స్థానికులను భయాందోళనకు గురి చేసింది. ఢీకొన్న వెంటనే హెలికాప్టర్లు భారీ ఎత్తున మంటల్లో చిక్కుకుని కుప్పకూలినట్లు సమాచారం.
ఈ దుర్ఘటనలో ఒకరు స్పాట్లోనే మృతి చెందగా, మరో వ్యక్తికి తీవ్ర గాయాలైనట్లు అధికారులు వెల్లడించారు. గాయపడిన వ్యక్తిని సమీపంలోని ఆసుపత్రికి తరలించి చికిత్స అందిస్తున్నారు. ఆయన పరిస్థితి విషమంగానే ఉన్నట్లు తెలుస్తోంది. ప్రమాదం జరిగిన ప్రాంతానికి అగ్నిమాపక సిబ్బంది, అత్యవసర సేవలు వెంటనే చేరుకుని మంటలను అదుపులోకి తీసుకువచ్చారు.
ప్రమాదానికి గల కారణాలపై ఇప్పటికీ స్పష్టత రాలేదు. సాంకేతిక లోపమా? లేక వాతావరణ పరిస్థితుల కారణమా? లేదా మానవ తప్పిదమా? అనే అంశాలపై అమెరికా విమానయాన అధికారులు దర్యాప్తు ప్రారంభించారు. ప్రమాద సమయంలో హెలికాప్టర్లు ఏ ప్రయోజనం కోసం ప్రయాణిస్తున్నాయన్న వివరాలపై కూడా విచారణ జరుగుతోంది.
Also read:పెండింగ్ బిల్స్..మాజీ సర్పంచ్ల పోరుబాట
ఈ ఘటనకు సంబంధించిన వీడియోలు, ఫొటోలు సోషల్ మీడియాలో వైరల్ అవుతున్నాయి. ప్రమాద తీవ్రతను చూపించే దృశ్యాలు చూసిన నెటిజన్లు తీవ్ర దిగ్భ్రాంతి వ్యక్తం చేస్తున్నారు. ఈ విషాద ఘటన అమెరికా అంతటా చర్చనీయాంశంగా మారింది.