భారత్‌, అమెరికా మధ్య వాణిజ్య ఒప్పందం త్వరలోనే ఖరారు కావచ్చని అమెరికా అధ్యక్షుడు డొనాల్డ్ ట్రంప్ ఆశాభావం వ్యక్తం చేశారు. గతంలో కుదుర్చుకున్న ఒప్పందాల కంటే ఈ ఒప్పందం చాలా భిన్నంగా ఉంటుందని పేర్కొన్నారు. ఏడాదికి పైగా కొనసాగుతున్న చర్చలు కీలక దశకు చేరుకున్నాయని ఆయన వ్యాఖ్యల ద్వారా స్పష్టమవుతోంది.
అక్టోబర్ 20న వైట్‌హౌస్‌లోని ఓవల్‌ కార్యాలయంలో విలేకరులతో మాట్లాడిన ట్రంప్.. భారత్‌, అమెరికా వాణిజ్య ఒప్పందానికి చాలా దగ్గరగా ఉన్నాయని తెలిపారు. ఒప్పందం కుదుర్చుకోవడానికి భారత్‌ ఆసక్తిగా ఉందని, ఇరు దేశాలు దీనిని ఖరారు చేసుకుంటాయని చెప్పారు. అయితే, ఒప్పందంలోని నిబంధనలు గతంలో చేసుకున్న ఒప్పందాల మాదిరిగా ఉండవని, కొత్త తరహాలో ఉంటాయని వివరించారు.
ట్రంప్ వ్యాఖ్యలు వెలువడిన సమయంలో అమెరికా విదేశాంగ మంత్రి మార్కో రూబియో భారత్‌లో పర్యటిస్తున్నారు. ఇరు దేశాల మధ్య సంబంధాలను మరింత బలోపేతం చేయడంపై ఆయన భారత అధికారులతో చర్చలు జరిపారు. వాణిజ్యం, ఇంధనం, సాంకేతికత, రక్షణ, ప్రజల మధ్య సంబంధాలు వంటి అంశాలు ఈ చర్చల్లో ప్రాధాన్యం సంతరించుకున్నాయి.
వాణిజ్య ఒప్పందంలోని మిగిలిన అంశాలను పరిష్కరించేందుకు ఇరు దేశాలు ప్రయత్నిస్తున్నాయని రూబియో కూడా గతంలో వెల్లడించారు. ఒప్పందాన్ని ఖరారు చేయడానికి ఇంకా కొద్ది అంశాలపైనే చర్చలు జరగాల్సి ఉందని ఆయన పేర్కొన్నారు.ఈ నెల ప్రారంభంలో భారత వాణిజ్య మంత్రి పీయూష్‌ గోయల్‌.. అమెరికా వాణిజ్య ప్రతినిధి జేమీసన్‌ గ్రీర్‌తో మిల్వాకీ, వాషింగ్టన్‌లలో సమావేశమయ్యారు. ప్రతిపాదిత వాణిజ్య ఒప్పందానికి సంబంధించిన వివిధ అంశాలపై చర్చించారు.
Also Read:జైలర్ 2@రూ.541 కోట్లు
ఈ ఏడాది ఫిబ్రవరిలో భారత్‌, అమెరికా ద్వైపాక్షిక వాణిజ్య ఒప్పందం (BTA) తొలి దశకు సంబంధించిన కార్యాచరణ ప్రణాళికను ఖరారు చేసినట్లు ప్రకటించాయి. అయితే, అమెరికా సుంకాల విధానంలో వచ్చిన మార్పుల కారణంగా ఒప్పందంపై చర్చలు మళ్లీ కొనసాగుతున్నాయి.