కాంగ్రెస్ ఎమ్మెల్సీ జీవన్ రెడ్డికి మతి భ్రమించింది. ఆయనకు వయసుపై బడడంతో కాళేశ్వరంపై అర్థరహితంగా మాట్లాడుతున్నార అని ఎమ్మెల్యే సుంకె రవిశంకర్,ఎమ్మెల్యే డాక్టర్ సంజయ్ లు మండిపడ్డారు. అసెంబ్లీ మీడియా పాయింట్ వద్ద ఈరోజు చొప్పదండి ఎమ్మెల్యే సుంకె రవిశంకర్ ,జగిత్యాల ఎమ్మెల్యే డాక్టర్ సంజయ్ కుమార్‌ మీడియాతో మాట్లాడారు.
ఎమ్మెల్యే సుంకె రవిశంకర్ మాట్లాడుతూ.. జీవన్ రెడ్డికి కండ్లు కనబడటం లేనట్టుంది,చెవులు వినబడటం లేనట్టుంది. అందుకే ఏదేదో మాట్లాడుతున్నారు. దేశం యావత్ కాళేశ్వరంను ప్రశంసించింది. న్యూ యార్క్ టైమ్స్ కూడా అద్భుతం అని కితాబిచ్చింది. తెలంగాణ పచ్చపడుతుంటే జీవన్ రెడ్డి కండ్లు ఎర్రబడుతున్నాయి అని రవిశంకర్ అన్నారు. కాంగ్రెస్ హాయంలో మిడ్ మానేరు ఎందుకు పూర్తి చేయ లేదో జీవన్ రెడ్డి చెప్పాలని ఎమ్మెల్యే రవిశంకర్ ప్రశ్నించారు.
మా నియోజకవర్గంలో ఉన్న గాయత్రి పంప్ హౌస్‌లో ఉన్న ఆరో మోటార్ కూడా వెట్ రన్ నిర్వహించాం. మా నియోజక వర్గంలో ఎన్నో చెరువులను కాళేశ్వరం నీటితో నింపుకున్నాం.అసెంబ్లీ సమావేశాల తర్వాత జీవన్ రెడ్డి మా నియోజవర్గానికి వస్తే వాస్తవాలు వివరిస్తామని ఎమ్మెల్యే రవిశంకర్ తెలిపారు. కెసిఆర్ తెలంగాణను కోటి ఎకరాల మాగాణిగా మార్చడాన్ని కాంగ్రెస్ నేతలు ఓర్చుకోలేకపోతున్నారు. ఇకపై జీవన్ రెడ్డి కాళేశ్వరంపై అబద్దాలు చెబితే సహించమని చొప్పదండి ఎమ్మెల్యే పేర్కొన్నారు.
జగిత్యాల ఎమ్మెల్యే డా .సంజయ్ మాట్లాడుతూ.. అబద్దాన్ని పదే పదే చెబితే నిజమవుతుందని జీవన్ రెడ్డి నమ్ముతున్నట్టుంది. కాళేశ్వరం ప్రాజెక్టు నుంచి ఒక్క ఎకరాకు నీళ్లు ఇవ్వలేదని జీవన్ రెడ్డి చెప్పడం దారుణం. ఎండి పోయిన ఎస్సారెస్పీ వరద కాలవ కాళేశ్వరం నీళ్లతో సజీవమైంది జీవన్ రెడ్డి కండ్లకు కనబడటం లేదా ?అని ఎమ్మెల్యే సంజయ్ ప్రశ్నించారు. మూడేళ్ళ లోనే కాళేశ్వరం ప్రాజెక్టు రూపంలో కెసిఆర్ అద్భుతం సృష్టించారు.
కాంగ్రెస్ నేతలు ఇలాంటి ప్రాజెక్టుకు ఎందుకు రూపకల్పన చేయలేదు. గోదావరి నదీ 150 కిలోమీటర్ల మేర కాళేశ్వరం నీళ్లతో సజీవమైన విషయం జీవన్ రెడ్డికి తెలియదా?…గోదావరి వెంబడి భూగర్భ జలాలు పెరగడానికి కాళేశ్వరం జలాలు కారణం కాదా ?.. కాలువల వెంబడి రైతులు మోటార్లు పెట్టుకుని పంటలకు నీళ్లు తరలించడం లేదా ?.. సీనియర్ నేతననే గుర్తింపుతో జీవన్ రెడ్డి ఇష్టా రీతిగా అబద్దాలు మాట్లాడొచ్చా ?.. జీవన్ రెడ్డి మాటలను ప్రజలు పట్టించుకోవడం లేదు. ప్రతి రోజూ వేలాదిగా ప్రజలు కాళేశ్వరం ప్రాజెక్టు సందర్శిస్తుండటం జీవన్ రెడ్డి అబద్దపు మాటలకు చెంపపెట్టు లాంటిది. ఇకనైనా జీవన్ రెడ్డి వాస్తవాలు మాట్లాడితే ఆయన సీనియారిటీకి హుందాగా ఉంటుంది అని సంజయ్ హితవు పలికారు.
