రాష్ట్రంలో ఉద్యోగులు, ఉపాధ్యాయుల సమస్యల పరిష్కారం కోసం చేపడుతున్న ‘ఛలో హైదరాబాద్’ సభకు ప్రభుత్వం ఇప్పటివరకు అనుమతి ఇవ్వకపోవడం తీవ్ర ఉత్కంఠకు దారితీసింది. రేపు నిర్వహించతలపెట్టిన ఈ భారీ బహిరంగ సభ అనుమతిపై ప్రభుత్వం తాత్సారం చేస్తుండటం పట్ల ఎంప్లాయీస్ జేఏసీ నాయకులు తీవ్ర ఆగ్రహం వ్యక్తం చేస్తున్నారు.
వివిధ సమస్యలపై ఎన్నిసార్లు విన్నవించినా ప్రభుత్వం నుండి సరైన స్పందన కరువైందని, చివరకు నిరసన తెలపడానికి సభకు అనుమతి కోరినా జాప్యం చేయడం ఉద్యోగులను నిరాశకు గురిచేస్తోందని జేఏసీ ఆరోపించింది. ప్రభుత్వ ప్రధాన కార్యదర్శి (CS) తో ఈ రోజు జేఏసీ నాయకులు జరిపిన చర్చల్లో ఎటువంటి పురోగతి లభించలేదని ఎంప్లాయీస్ జేఏసీ స్పష్టం చేసింది. దాంతో ప్రభుత్వంపై ఒత్తిడి పెంచేందుకు ఉద్యోగ సంఘాలు మరింత పట్టుదలతో ఉన్నాయి.
సభకు అనుమతి లేకపోతే నిరసనలు: ప్రభుత్వం ఒకవేళ సభకు అనుమతి నిరాకరిస్తే, దానికి నిరసనగా రాష్ట్రవ్యాప్తంగా ప్రత్యక్ష నిరసన కార్యక్రమాలకు దిగుతామని జేఏసీ స్పష్టమైన హెచ్చరికలు జారీ చేసింది. గత ఎన్నికల సమయంలో ఉద్యోగులకు ఇచ్చిన హామీలను వెంటనే నిలబెట్టుకోవాలని డిమాండ్ చేస్తున్నారు.
ప్రధాన డిమాండ్లు ఇవే:
డీఏ బకాయిలు: పెండింగ్లో ఉన్న 6 కరువు భత్యాల (DA) ను వెంటనే విడుదల చేయాలి.
2వ పీఆర్సీ (PRC): రెండవ పిఆర్సి కమిషన్ సిఫార్సులను వేగవంతం చేసి ఆమోదించాలి.
పాత పెన్షన్ విధానం (OPS): సీపీఎస్ రద్దు చేసి పాత పెన్షన్ విధానాన్ని అమలు చేయాలి.
Also Read:హెర్బల్ డిటాక్స్తో కిడ్నీలకు హాని?
పెండింగ్ బకాయిల చెల్లింపు: ఉద్యోగులకు రావాల్సిన ఇతర ఆర్థిక, ఉద్యోగిత బకాయిలను తక్షణమే విడుదల చేయాలి.
ప్రభుత్వ నిర్లక్ష్య వైఖరిపై ఉద్యోగ సమాజం మండిపడుతుండగా, ప్రభుత్వం ఈ సభ అనుమతి విషయంలో ఎలాంటి నిర్ణయం తీసుకుంటుందోనని ఉత్కంఠ నెలకొంది.