కృష్ణా నది పరవళ్లతో శ్రీశైలం ప్రాజెక్టు వద్ద జలదృశ్యం కనువిందు చేస్తోంది. శ్రీశైలం డ్యామ్‌కు భారీగా వరద నీరు చేరుతుండడంతో నిన్న సాయంత్రం నాలుగు గేట్లు ఎత్తివేయగా.. ఇవాళ ఉదయం 10 గేట్లను ఎత్తివేశారు.
ఇక శ్రీశైలం పర్యటనలో భాగంగా మల్లికార్జున భ్రమరాంబిక దేవాలయానికి వెళ్లిన తెలంగాణ మంత్రులు మల్లన్నను దర్శించుకున్నారు. స్వామి వారిని దర్శించుకున్న వారిలో సింగిరెడ్డి నిరంజన్ రెడ్డి ,శ్రీనివాస్ గౌడ్,ఎమ్మెల్యేలు గువ్వల బాలరాజు, మర్రి జనార్దన్ రెడ్డి, జైపాల్ యాదవ్, ఆల వెంకటేశ్వర్ రెడ్డిలతోపాటు ఏపీ మంత్రి అనిల్ కుమార్ యాదవ్ ఉన్నారు.
ఈ సందర్భంగా ఆలయ అర్చకులు పూర్ణకుంభతో వారికి ఘనస్వాగతం పలికారు. అనంతరం నేతలను ఆలయ సిబ్బంది సన్మానించి ప్రసాదాన్ని అందజేశారు.మరోవైపు శ్రీశైలం గేట్ల ఎత్తివేతతో ఈ అద్భుతమైన రమణీయ దృశ్యాన్ని చూసేందుకు పర్యాటకులు భారీ సంఖ్యలో తరలివస్తున్నారు.
