విజయానికి చేరువలో టీమిండియా

వెస్టిండీస్‌తో ఢిల్లీ వేదికగా జరుగుతున్న రెండో టెస్టులో టీమిండియా విజయం ముంగిట నిలిచింది. 121 పరుగుల టార్గెట్‌తో బరిలోకి దిగిన టీమిండియా నాలుగో రోజు ఆట ముగిసే సమయానికి ఒక వికెట్ నష్టపోయి 63 పరుగులు చేసింది. చేతిలో ఇంకా 9 వికెట్లు ఉండగా విజయానికి 58 పరుగులు కావాలి. క్రీజులో కేఎల్ రాహుల్ (25), సాయి సుద‌ర్శ‌న్ (30)లు ఉన్నారు.

అంతకముందు ఓవర్‌నైట్‌ 173/2 స్కోరుతో నాలుగో రోజు రెండో ఇన్నింగ్స్‌ను కొన‌సాగించిన విండీస్ 217 ప‌రుగులు జోడించి 390 పరుగులు చేసింది. కాంప్‌బెల్ (115), షై హోప్ (103) సెంచరీలు చేయగా జస్టిన్ గ్రీవ్స్ (50*), రోస్టన్ ఛేజ్ (40), జైడెన్ సీల్స్ (32) లు రాణించారు. కుల్దీప్ యాద‌వ్, బుమ్రా మూడు వికెట్లు తీయగా సిరాజ్ రెండు వికెట్లు ప‌డ‌గొట్టారు.

తొలి ఇన్నింగ్స్‌లో భారత్ 518/5 స్కోరు వద్ద డిక్లేర్ చేయగా విండీస్ తొలి ఇన్నింగ్స్‌లో 248 ప‌రుగుల‌కే కుప్ప‌కూలింది. ఫాలో ఆన్ ఆడిన వెస్టిండీస్ రెండో ఇన్నింగ్స్‌లో 390 ప‌రుగులు చేసి ఆలౌట్ అయింది.

Also Read:తెలంగాణలో హ్యామ్ రోడ్లకు గ్రీన్ సిగ్నల్