తెలంగాణ స్పీకర్ గడ్డం ప్రసాద్ కుమార్కు సుప్రీం కోర్టు నోటీసులు జారీ చేయడం రాష్ట్ర రాజకీయాల్లో ప్రాధాన్యత సంతరించుకుంది. ఫిరాయింపు ఎమ్మెల్యేల అంశంలో స్పీకర్ వ్యవహారశైలిపై తీవ్ర అభ్యంతరాలు వ్యక్తమవుతున్న నేపథ్యంలో, కోర్టు ఈ నోటీసులు ఇవ్వడం చర్చనీయాంశంగా మారింది. స్పీకర్ కోర్టు ధిక్కరణకు పాల్పడ్డారని ఆరోపిస్తూ బీజేపీ ఎమ్మెల్యే ఏలేటి మహేశ్వర్ రెడ్డి సుప్రీం కోర్టును ఆశ్రయించారు.
ఫిరాయింపు ఎమ్మెల్యేలపై నిర్ణయం తీసుకోవడంలో స్పీకర్ అనవసరంగా ఆలస్యం చేస్తున్నారని, అలాగే వారికి క్లీన్ చీట్ ఇవ్వడం రాజ్యాంగ విరుద్ధమని మహేశ్వర్ రెడ్డి తన పిటిషన్లో పేర్కొన్నారు. ఈ అంశం ప్రజాస్వామ్య వ్యవస్థకు ప్రమాదకరమని, స్పీకర్ తటస్థంగా వ్యవహరించలేదని ఆరోపించారు. ఈ నేపథ్యంలో స్పీకర్కు సుప్రీం కోర్టు నోటీసులు జారీ చేసింది.
ఇక ఇదే అంశంపై బీఆర్ఎస్ వర్కింగ్ ప్రెసిడెంట్ కేటీఆర్ ఇప్పటికే దాఖలు చేసిన ప్రధాన పిటిషన్తో పాటు, మహేశ్వర్ రెడ్డి పిటిషన్ను కూడా జత చేయాలని సుప్రీం కోర్టు ఆదేశించింది. దీని ద్వారా ఫిరాయింపు ఎమ్మెల్యేల వ్యవహారాన్ని సమగ్రంగా విచారించేందుకు కోర్టు సిద్ధమవుతున్నట్లు స్పష్టమవుతోంది.
ఫిరాయింపు ఎమ్మెల్యేలకు క్లీన్ చీట్ ఇవ్వడాన్ని సవాల్ చేస్తూ దాఖలైన ఈ పిటిషన్పై విచారణ కొనసాగనుండగా, స్పీకర్ పాత్ర, ఆయన తీసుకున్న నిర్ణయాలు న్యాయపరమైన పరిశీలనకు లోనుకానున్నాయి. ఈ కేసు తెలంగాణ రాజకీయ భవిష్యత్తుపై, అలాగే స్పీకర్ అధికారాలపై కీలక ప్రభావం చూపే అవకాశం ఉందని రాజకీయ వర్గాలు భావిస్తున్నాయి.
Also Read:బండ్ల గణేష్..అందరివాడు!