మహేష్ బాబు నటించిన బ్రహ్మోత్సవం సినిమా గుర్తుందా..! శ్రీకాంత్‌ అడ్డాల దర్శకత్వం వహించిన బ్రహ్మోత్సవంలో వెండితెరపై పట్టలేనంత మందిని నింపి సోషల్ మీడియాలో విమర్శలకు గురైన సంగతి తెలిసిందే. ఇప్పుడు అదే స్టైల్లో మరో ఫోటో హల్ చల్ చేస్తోంది. అది సూపర్ స్టార్ రజనీ కాంత్‌ ఫ్యామిలీ ఫోటో.. రియల్ ఫ్యామిలీ ఫోటో కాదు.. రీల్ ఫ్యామిలీ ఫోటో.. మొత్తం 14 మంది కుటుంబ సభ్యులు, ఓ కుక్క ఉన్న ఈ ఫస్ట్‌లుక్‌ ఫోటో అభిమానుల్ని ఆకట్టుకుంటోంది.
పా. రంజిత్‌ దర్శకత్వంలో తెరకెక్కుతోన్న చిత్రం ‘కాలా’. రజనీ అల్లుడు, నటుడు ధనుష్‌ ఈ చిత్రాన్ని నిర్మిస్తున్నారు. ఇందులో రజనీ గ్యాంగ్‌స్టర్‌ పాత్రలో కనిపించనున్నారు. ఈ సినిమా చిత్రీకరణ దాదాపు పూర్తైంది. తొలి భాగం షూటింగ్‌ ముంబయిలో జరగ్గా.. రెండో భాగం తమిళనాడులో తీస్తున్నారు. అయితే ఈ ఫోటో సినిమాకు సంబంధించిన ఫోటోలా కనిపించడం లేదని.. ఏదో సీరియల్‌కి సంబంధించిన ఫోటోలా ఉందని సోషల్ మీడియాలో రజనీ ఫ్యాన్స్ తెగ ఫీలైపోతున్నారు.
‘కాలా’లో రజనీ భార్య పాత్రలో ఈశ్వరీరావు నటిస్తున్నారు. నానా పటేకర్‌ విలన్‌గా నటిస్తున్నాడు. బాలీవుడ్‌ నటి హ్యుమా ఖురేషీ ఇందులో హీరోయిన్‌గా నటిస్తున్నట్లు సమాచారం. కానీ పై ఫోటోలో ఆమె కనపడలేదు.
