రజినీతో జక్కన్న రెడీ…

దర్శకుడిగా రాజమౌళి సంపాదించిన ఇమేజ్ అంతా ఇంతాకాదు. బాహుబలితో జక్కన్న పేరు ఇప్పుడు ఇండియా మొత్తం మార్మోగుతోంది.  అయితే తాజాగా రాజమౌళి స్టూడెంట్స్ తో మాట్లాడుతూ .. తన మనసులోని భావాలను వాళ్లతో పంచుకున్నారు.

తాను హాలీవుడ్ కి వెళాతానంటూ వస్తోన్న వార్తల్లో నిజం లేదని అన్నారు. ఇక్కడే వుంటూ ఆ స్థాయి సినిమాలు చేస్తానని చెప్పారు. తనకి ప్రభాస్ అన్నా .. ఎన్టీఆర్ అన్నా చాలా ఇష్టమని, కథానాయికలలో అనుష్క కమిట్మెంట్ తనకి బాగా నచ్చుతుందని చెప్పారు.

ఇదిలా ఉండగా..సూపర్‌ స్టార్‌ రజనీకాంత్ తో సినిమా చేయాలనుకునే దర్శకులలో తాను ఒకడినని అన్నారు. అయితే రజినీకాంత్ సాధించిన పేరు ప్రఖ్యాతుల గురించి.. ఆయన ఇమేజ్ గురించి కొత్తగా చెప్పాల్సిన పని లేదు. వీళ్లిద్దరూ కలిసి ఒక సినిమా చేస్తే దానికి ఆకాశమే హద్దు అన్నది చాలామంది అభిప్రాయం. అంతేకాదు అది ‘బాహుబలి’ని కూడా మించిపోతుందని అంటున్నారు.

మలయాళంలో ‘ప్రేమమ్’ లాంటి ఆల్ టైం క్లాసిక్ తీసిన అల్ఫాన్సో పుతెరిన్ ఈ కాంబినేషన్ గురించి మాట్లాడుతూ.. వాళ్లిద్దరూ కలిసి సినిమా చేస్తే అది ‘అవతార్’ కన్నా పెద్దదవుతుందన్నాడు. ఈ మాటలు కొంచెం అతిశయోక్తిగా అనిపించొచ్చు కానీ.. ఈ కాంబో ఫిక్స్‌ అయితే మాత్రం మామూలుగా ఉండదన్నది వాస్తవం.

ఇక రాజమౌళి కూడా రజినీతో సినిమా చేయడానికి ఆశపడున్నట్లు.. రజినీ కూడా ఆసక్తితోనే ఉన్నట్లు కొన్ని రోజులుగా మీడియాలో ప్రచారం జరుగుతోంది. ఈ నేపథ్యంలో లండన్ లో బాహుబలి టీంతో కలిసి ఓ సినీ కార్యక్రమంలో పాల్గొన్న రాజమౌళి.. రజినీతో సినిమా గురించి స్పందించాడు.

‘‘రజినీకాంత్ చాలా పెద్ద స్టార్. ఆయన అణకువకు మారుపేరు. రజినీ సార్ తో సినిమా అంటే ఏ దర్శకుడికైనా కల నెరవేరినట్లే. నేను కూడా అందుకు మినహాయింపు కాదు. ఐతే నేను ఎవరితో ఏ సినిమా చేయాలన్నా కథే నన్ను నడిపించాలి. కథను బట్టే నటీనటుల్ని ఎంచుకుంటా. ఆయనకు సరిపడే కథ నా దగ్గరుంటే.. ఆయనతో సినిమా చేసేలా కథ నన్ను ఇన్ స్పైర్ చేస్తే కచ్చితంగా చేస్తా. అదే జరిగితే ఈ లోకంలో నాకంటే సంతోషించే వ్యక్తి మరొకరు ఉండరు’’ అని రాజమౌళి అన్నాడు. దాంతో త్వరలో రజనీతో రాజమౌళి సినిమా చేయడం ఖాయమనే అభిప్రాయాలు వ్యక్తమవుతున్నాయి.