తెలంగాణ ప్రభుత్వం ప్రతిష్ఠాత్మకంగా నిర్మిస్తున్న యాదాద్రి లక్ష్మీనరసింహస్వామి ఆలయ పునర్నిర్మాణానికి విరాళాలు వెల్లువెత్తుతున్నాయి. ముఖ్యమంత్రి కేసీఆర్‌ పిలుపు మేరకు లక్ష్మీనరసింహస్వామి విమాన గోపురం స్వర్ణతాపడం కోసం దాతలు కిలోల కొద్దీ బంగారం విరాళాలుగా ఇస్తున్నారు.ఇప్పటివరకు దాతలు 36.16 కిలోల బంగారాన్ని విరాళంగా ఇచ్చారు.
ఇక విరాళాల కోసం ప్రత్యేక బ్యాంకు నెంబర్‌ను ఏర్పాటు చేశారు వైటీడీఏ అధికారులు. ఇక తాజాగా యాదాద్రి శ్రీలక్ష్మి నరసింహా స్వామివారికి సంబంధించిన అధికారిక బ్యాంకు క్యూ ఆర్ కోడ్‌ను బుధవారం ఆలయ ఈఓ గీత విడుదల చేశారు. స్వామి ప్రధానాలయంలోని విమాన గోపురం బంగారు తాపడానికి ప్రజలు, స్వామి వారి భక్తులు తమ మొబైల్ ద్వారా క్యూర్ కోడ్‌ను స్కాన్ చేసి, విరాళం అందించొచ్చని తెలిపారు.
దాతలు బ్యాంక్‌కు నేరుగా రాకుండా ఎక్కడి వాళ్ళు అక్కడే విరాళం అందజేసేందుకు బ్యాంక్ క్యూ ఆర్ కోడ్‌ను అందుబాటులోకి తీసుకువచ్చామని పేర్కొన్నారు. ఇది యాదగిరిగుట్ట పట్టణానికి చెందిన ఇండియన్ బ్యాంక్‌కు చెందిన క్యూ ఆర్ కోడ్ అని వెల్లడించారు.
