దక్షిణ మధ్య రైల్వేకు రికార్డు ఆదాయం

దక్షిణ మధ్య రైల్వే (SCR) ఆదాయంలో సరికొత్త రికార్డు నెలకొల్పింది. జనవరి నుంచి నవంబర్ వరకు రూ.19,314 కోట్ల ఆదాయం సాధించి గతేడాదితో పోలిస్తే గణనీయమైన వృద్ధిని నమోదు చేసింది. గత ఆర్థిక సంవత్సరంలో ఇదే కాలానికి దక్షిణ మధ్య రైల్వే ఆదాయం రూ.18,831 కోట్లు కాగా, ఈసారి రూ.483 కోట్లు అదనంగా వచ్చాయని అధికారులు వెల్లడించారు. ప్రయాణికుల రద్దీ పెరగడం, సరుకు రవాణా ఆదాయం మెరుగుపడటం ఇందుకు ప్రధాన కారణాలుగా పేర్కొన్నారు.

ప్రయాణికుల విభాగంలో సాధారణ రైళ్లతో పాటు ఎక్స్‌ప్రెస్, సూపర్ ఫాస్ట్ రైళ్లకు డిమాండ్ పెరగడం ఆదాయాన్ని పెంచిందని రైల్వే అధికారులు తెలిపారు. అలాగే బొగ్గు, ఇనుము ధాతువు, సిమెంట్, ఆహార ధాన్యాల వంటి సరుకు రవాణా ద్వారా కూడా భారీ ఆదాయం లభించిందన్నారు. ఆధునికీకరణ చర్యలు, సమయపాలన, సేవల మెరుగుదల వల్ల ప్రయాణికుల విశ్వాసం మరింత పెరిగిందని అధికారులు అభిప్రాయపడ్డారు.

ఇదిలా ఉండగా, రాబోయే సంక్రాంతి పండుగను దృష్టిలో పెట్టుకుని మరో 11 ప్రత్యేక రైళ్లు నడపనున్నట్లు దక్షిణ మధ్య రైల్వే ప్రకటించింది. పండుగ సందర్భంగా స్వగ్రామాలకు వెళ్లే ప్రయాణికుల రద్దీని తగ్గించేందుకు ఈ ప్రత్యేక రైళ్లు ఎంతో ఉపకరిస్తాయని తెలిపింది. ప్రయాణికులకు సౌకర్యవంతమైన, సురక్షితమైన ప్రయాణాన్ని అందించడమే తమ ప్రధాన లక్ష్యమని దక్షిణ మధ్య రైల్వే అధికారులు స్పష్టం చేశారు.

Also Read:KTR:ఫిరాయింపు ఎమ్మెల్యేలకు డోర్స్ క్లోజ్