చాలా రోజుల తర్వాత సినిమా పనుల్లో బిజీగా మారాడు శ్రీకాంత్ అడ్డాల. మహేష్ బాబు హీరోగా ఆయన దర్శకత్వంలో వచ్చిన చిత్రం ‘బ్రహ్మోత్సవం’. ఈ సినిమాతో భారీ ఫ్లాప్‌ను మూటగట్టుకున్న సంగతి తెలిసిందే. ఈ సినిమా తర్వాత రెండు సంవత్సరాల వరకూ ఎవరితోనూ సినిమా చేయలేదు శ్రీకాంత్. ఈ సారి మాత్రం ఓ మంచి హిట్‌ను కొట్టేందుకు బ్రదర్స్ సెంట్‌మెంట్‌తో మరోసారి మనముందుకొస్తున్నాడు.
గతంలో ఇదే సెంట్‌మెంట్‌తో వచ్చిన చిత్రం ‘సీతమ్మ వాకిట్లో సిరిమల్లెచెట్టు’ ఇందులో మహేష్ బాబు, వెంకటేష్ అన్నదమ్ములుగా నటించారు. ఈ చిత్రంతో మంచి విజయాన్ని అందుకున్నాడు శ్రీకాంత్. అందుకే మరోసారి ఇదే సెంట్‌మెంట్‌ను ఫాలో అవుతున్నాడు. త్వరలో తెరకెక్కించే సినిమాకు సంబంధించి మెయిన్‌ హీరోగా శర్వానంద్‌ను ఇప్పటికే తీసుకున్నాడు.
కథలో భాగంగా ఇద్దరు హీరోల అవసరముండటంతో తాజాగా మరో యంగ్ హీరో శ్రీ విష్ణును ఎంపిక చేసుకుని సినిమాను త్వరత్వరగా తెరకెక్కించే పనుల్లో ఉన్నాడు శ్రీకాంత్ అడ్డాల. శ్రీవిష్ణు హీరోగా ఈ మధ్య ‘మెంటల్‌ మదిలో’, ‘నీదీ నాదీ ఒకే కథ’ సినిమాలతో మనముందుకొచ్చి మంచి హిట్‌ను అందుకున్నాడు. వరుస విజయాలతో దూకుడుమీదున్న శ్రీవిష్ణు శ్రీకాంత్ సినిమాకు అంగీకరించినట్లు వార్తలు వినిపిస్తున్నాయి.
