ఎన్టీఆర్ బయోపిక్‌… ప్రస్తుతం ఈ సినిమా గురించి రోజుకో వార్త టీ టౌన్‌లో చక్కర్లు కొడుతోంది. ఎన్టీఆర్ జీవిత చరిత్ర ఆధారంగా రెండు సినిమాలు తెరకెక్కుతున్నాయి. ఒకటి వివాదాస్పద దర్శకుడు రాంగోపాల్ వర్మ తెరకెక్కిస్తుండగా మరొకటి నేనే రాజు నేనే మంత్రితో మంచి జోష్ మీదున్న తేజ దర్శకత్వంలో ప్రేక్షకుల ముందుకురానుంది. తేజ దర్శకత్వంలో తెరకెక్కనున్న సినిమా గురించి పక్కనపెడితే వర్మ దర్శకత్వంలో తెరకెక్కనున్న సినిమాపై రోజుకో వార్త టీ టౌన్‌లో చక్కర్లు కొడుతోంది.
తాజాగా తన ఫేస్ బుక్ ఖాతాలో ఆయన ఓ ఫొటోను అప్ లోడ్ చేశారు. ఓ కార్యక్రమం సందర్భంగా ఎన్టీఆర్ కు షేక్ హ్యాండ్ ఇస్తున్న ఫొటో ఇది. ఈ ఫొటోలోనే చిన్న బాక్స్ లో ఎన్టీఆర్, లక్ష్మీపార్వతిలు దండలు మార్చుకుంటుండగా… వారికి సమీపంలో చంద్రబాబు నిలిచి ఉన్న ఫొటోను ఉంచారు. ‘ఆయనపై సినిమా తీస్తున్నందుకు నన్ను ప్రశంసిస్తున్న ఎన్టీఆర్’ అంటూ కామెంట్ పెట్టారు.
సినిమాపై ఎన్ని విమర్శలు వస్తున్న పట్టించుకోని వర్మ రిలీజ్ డేట్ కూడా ప్రకటించేశాడు. లక్ష్మీస్ ఎన్టీఆర్ సినిమా తీయడానికి నాకు అపారమయిన బలమిస్తున్న కేవలం ఒకే ఒక శక్తి ఎవరంటే అది ఎన్టీఆర్ అనే వ్యక్తి.. ఆ మహానుభావుడి ఆత్మ రోజూ నా కలలోకి వచ్చి నాకు స్క్రీన్ ప్లే రాయడానికి సహకరిస్తోంది అంటూ కామెంట్ చేశాడు.
ఈ చిత్రానికి వైసీపీ నేత రాకేశ్ రెడ్డి నిర్మాతగా వ్యవహరిస్తుండగా.. సినిమాను 2018 ఫిబ్రవరిలో ప్రారంభించి అక్టోబర్ లో రిలీజ్ చేసేందుకు ప్లాన్ చేస్తున్నారు. ఈ సినిమా విషయంలో తను ఎన్టీఆర్ కుటుంబీకులను ఎవ్వరినీ కలవను అని వర్మ కుండబద్ధలు కొట్టాడు.
