హీరో రాజశేఖర్ ప్రస్తుతం క్రైమ్ థ్రిల్లర్ కథాంశంతో ఓ సినిమాలో నటిస్తున్నాడు. ఈ సినిమాకు ‘శేఖ‌ర్’ అనే పేరును ఖ‌రారు చేశారు. ఈ సినిమాను కొత్త ద‌ర్శ‌కుడు లలిత్ కుమార్ తెరకెక్కిస్తున్నాడు. ఈ నెల మూడో వారం నుంచి ఈ సినిమా షూటింగ్ ప్రారంభం కానుంది. లక్ష్య ప్రొడక్షన్స్, పెగాసస్ సినీ కార్పొరేషన్ సంస్థలు ఈ సినిమాను నిర్మిస్తున్నాయి. ఈ మూవీకి అనూప్ రూబెన్స్ సంగీతం అందిస్తున్నారు. అయితే ఈ రోజు రాజశేఖర్ జన్మదినం సందర్భంగా ఈ చిత్రానికి సంబంధించిన ఫస్ట్‌లుక్‌ను విడుదల చేసింది యూనిట్. ఇక ఫస్ట్ లుక్‌లో హీరో రాజశేఖర్ సరికొత్త అవతారంలో క‌న‌ప‌డుతూ అల‌రిస్తున్నారు. ఈ లుక్‌లో ఆయ‌న ముఖంలోని స‌గం భాగాన్నే చిత్ర యూనిట్ చూపించింది.
ఈ సందర్భంగా రాజశేఖర్ ఓ ఎమోష‌న‌ల్ పోస్ట్ కూడా ట్వీట్ చేశారు.. ప్రియాతి ప్రియ‌మైన.. నన్ను ప్రేమించే వాళ్ళంద‌ర‌కి, నేను ప్రేమించే నా అభిమానుల‌కి .. అతి భ‌యంక‌ర‌మైన కోవిడ్ 19, నన్ను మ‌ర‌ణ‌పు స‌రిహ‌ద్దుల్లోకి తీసుకెళ్లినా, మీ ప్రేమ, అభిమానం, నిరంత‌ర ప్రార్ధ‌న‌ల‌తో, నన్ను మ‌ళ్ళీ ఈ నా పుట్టిన రోజు నాడు కొత్త సినిమా షూటింగ్ ప్రారంభించే స్థితికి తీసుకొచ్చాయి. క‌నిపించని ఆ దేవుడికి, క‌నిపించే దేవుళ్ళైన మీకు స‌దా కృత‌జ్ఞ‌త‌లు తెలుపుకుంటూ, ఎల్ల‌ప్పుడు మీకు రుణ‌ప‌డి ఉంటాను అని రాజశేఖర్ ట్విట్టర్‌ ద్వారా పేర్కొన్నారు.
