ప్రముఖ నటుడు, దర్శకుడు, కొరియోగ్రాఫర్ రాఘవ లారెన్స్ ఇటీవల తాను చేసిన కొన్ని వ్యాఖ్యలపై చెలరేగిన వివాదంపై స్పందించారు. ఓ ఇంటర్వ్యూలో వీధి కుక్కలను ఉద్దేశించి చేసిన వ్యాఖ్యలు సామాజిక మాధ్యమాల్లో తీవ్ర విమర్శలకు దారితీయడంతో ఆయన సోమవారం ఒక సుదీర్ఘ వివరణను విడుదల చేశారు. తన మాటలను పూర్తిగా తప్పుగా అర్థం చేసుకున్నారని , జంతువులను కించపరచడం తన ఉద్దేశం కాదని ఆయన స్పష్టం చేశారు.
ఇంటర్వ్యూలో రాఘవ లారెన్స్ మనుషుల ప్రవర్తనను, విశ్వాసాన్ని వివరించే క్రమంలో వీధి కుక్కల ఉదాహరణను ఉపయోగించారు. అయితే, కొందరు నెటిజన్లు మరియు జంతు ప్రేమికులు ఆ వ్యాఖ్యలను తప్పుగా చిత్రీకరిస్తూ.. లారెన్స్ వీధి కుక్కలను తక్కువ చేసి మాట్లాడారని వాటి పట్ల నిర్లక్ష్యపూరిత వైఖరిని ప్రదర్శించారంటూ సోషల్ మీడియాలో ఆయనపై విమర్శల వర్షం కురిపించారు.
నేను మాట్లాడిన మాటల వెనుక ఉన్న నిజమైన ఉద్దేశాన్ని పక్కనపెట్టి, వాటిని కావాలనే కొందరు తప్పుగా ప్రచారం చేస్తున్నారు. నేను ఎల్లప్పుడూ మూగజీవాలను ప్రేమించే వ్యక్తిని. నా జీవితంలో ఎన్నో సామాజిక సేవా కార్యక్రమాలు చేశాను, జంతువుల సంరక్షణకు కూడా నా వంతు మద్దతు ఇచ్చాను. అలాంటిది నేను వీధి కుక్కలను కించపరుస్తూ మాట్లాడతానని అనుకోవడం చాలా విచారకరం. నా మాటలు ఎవరినైనా బాధించి ఉంటే క్షమించండి, కానీ నా ఉద్దేశం అది కాదు అని వివరించారు.
Also Read:టీఎంసీ రెబల్స్…NCPIలో విలీనం!
రాఘవ లారెన్స్ కేవలం సినిమాలకే పరిమితం కాకుండా ట్రస్ట్ ద్వారా ఎంతో మంది వికలాంగులకు, అనాథ పిల్లలకు మరియు గుండె జబ్బులతో బాధపడుతున్న వారికి ఉచిత వైద్యం అందిస్తూ రియల్ హీరోగా పేరు తెచ్చుకున్నారు.