అందరిని కలుపుకోని పోండి: రేవంత్‌తో ప్రియాంక

మునుగోడు ఉప ఎన్నికలకు సంబంధించి టీకాంగ్రెస్ నేతలతో భేటీ అయ్యారు ప్రియాంకగాంధీ. పీసీసీ చీఫ్ రేవంత్ రెడ్డి, ఉత్తమ్ కుమార్ రెడ్డి, భట్టి విక్రమార్క, మధుయాష్కి, శ్రీధర్ బాబు,దామోదర రాజనర్సింహా తదితర నేతలు హాజరయ్యారు.

దాదాపు రెండుగంటల పాటు ఈ భేటీ జరుగగా పలు కీలక సూచనలు చేసినట్లు సమాచారం. రాష్ట్ర వ్యవహారాలను తాను పరిశీలిస్తున్నానని ఈ సందర్భంగా నేతలకు తెలిపారు ప్రియాంక. నేతల మధ్య చిన్న చిన్న విభేదాలే తప్ప పెద్ద సమస్యలేవీ లేవని…ఏదైనా సమస్య ఉంటే నేరుగా తనను కలవచ్చని ప్రియాంక తెలిపారు.

ఇక మునుగోడు ఎన్నికల్లో అభ్యర్థిని ఎన్నుకునే బాధ్యత నల్గొండ జిల్లా నేతలకే అప్పగించినట్లు తెలుస్తోంది. పరస్పరం సహకారం ఉంటేనే పార్టీ గెలుస్తుందని… అందరినీ కలుపుకొని పోవాలని రేవంత్ రెడ్డికి సూచించారు ప్రియాంక.