ఆసియా క్రీడల గోల్ఫ్ పోటీల్లో భారత్ బోణీ కొట్టింది. మహిళల వ్యక్తిగత విభాగంలో ప్రణవి ఉర్స్ స్వర్ణ పతకం సాధించి నయా చరిత్ర సృష్టించారు. ఆమె అద్భుత ప్రదర్శనతో భారత్ టీమ్ ఈవెంట్‌లోనూ రజత పతకాన్ని కైవసం చేసుకుంది.
ఆసియా క్రీడల మహిళల గోల్ఫ్ విభాగంలో స్వర్ణం గెలిచిన తొలి భారతీయ క్రీడాకారిణిగా శనివారం ప్రణవి ఉర్స్ నిలిచారు. ఆఖరి వరకూ ఉత్కంఠగా సాగిన ఈ టోర్నమెంట్‌లో ఒక స్ట్రోక్ ఆధిక్యంతో విజయాన్ని అందుకోవడమే కాకుండా, భారత జట్టుకు రజతం అందించడంలో కీలక పాత్ర పోషించారు. అత్యుత్తమ ఆటతీరుతో ఓవరాల్‌గా 15-అండర్-పార్ 265 స్కోరు సాధించిన ఆమె, ఆసియా క్రీడల మహిళల గోల్ఫ్లో చాంపియన్‌‌గా నిలిచి భారత్‌కు చిరస్మరణీయ విజయాన్ని అందించారు.
మహిళల గోల్ఫ్ టీమ్ విభాగంలో భారత్ 14-అండర్ 546 స్కోరుతో రజత పతకాన్ని గెలుచుకుంది. ప్రణవి ఉర్స్, అదితి అశోక్, దీక్షా డాగర్‌లతో కూడిన భారత త్రయం ఈ రజత పతకంతో స్వదేశానికి తిరిగి రానుంది. మైసూర్ క్రీడాకారిణి ప్రణవి, మూడో హోల్‌లో పడిన ట్రిపుల్ బోగీ వల్ల తన 3-స్ట్రోక్‌‌ల ఆధిక్యాన్ని కోల్పోయినప్పటికీ, వెంటనే కోలుకున్నారు. ఆ తర్వాత మూడు బర్డీలు సాధించి రౌండ్‌ను నిలబెట్టుకుంటూ అగ్రస్థానానికి పోటీలో నిలిచారు.
చివరి రౌండ్‌లో ప్రణవి ఈవెన్-పార్ 70 స్కోరు నమోదు చేసి, నాలుగు రోజుల ముగింపు సమయానికి 15-అండర్ 265తో నిలిచారు. దీంతో ఆమె తన సమీప ప్రత్యర్థుల కంటే ఒక స్ట్రోక్ ఆధిక్యంలో పసిడి పతకాన్ని ముద్దాడారు.
Also Read:‘మరకతమణి 2’..షూటింగ్ పూర్తి
భారత్ టీమ్ విభాగంలో రజతం సాధించడంలో ప్రణవి సాధించిన స్కోరు ఎంతో దోహదపడింది. ఆఖరి రౌండ్‌లో అదితి అశోక్ 67, దీక్షా డాగర్ 77 స్కోర్లు సాధించారు. టీమ్ ర్యాంకింగ్స్ నిర్ణయించేందుకు బృందంలోని ఇద్దరి అత్యుత్తమ స్కోర్లను పరిగణనలోకి తీసుకుంటారు. ఈ క్రమంలో భారత్ 14-అండర్ 546 స్కోరుతో రెండో స్థానంలో నిలవగా, చైనా 22-అండర్ 538 స్కోరుతో స్వర్ణ పతకాన్ని గెలుచుకుంది. 2002లో శివ్ కపూర్ పురుషుల వ్యక్తిగత విభాగంలో టైటిల్ గెలిచిన తర్వాత ఆసియా క్రీడల గోల్ఫ్లో భారత్‌కు లభించిన తొలి స్వర్ణం ఇదే కావడం విశేషం.