మాజీ మంత్రి ఎర్రబెల్లి దయాకర్ రావుపై తొర్రూరు పోలీస్ స్టేషన్లో కేసు నమోదు అయింది. ఆయనతో పాటు మరో 33 మంది బీఆర్ఎస్ నేతలు, కార్యకర్తలపై పోలీసులు ఎఫ్ఐఆర్ నమోదు చేశారు. భారత న్యాయ సంహిత (BNS)లోని 189(2), 223, 126(2), 132, r/w 190 సెక్షన్ల కింద కేసులు నమోదు చేసినట్లు పోలీసులు తెలిపారు.
ఈ కేసులు ఎన్నికల కోడ్ ఉల్లంఘనతో పాటు పోలీసుల విధులకు ఆటంకం కలిగించారన్న ఆరోపణలపై నమోదు అయ్యాయి. కేసీఆర్కు సిట్ నోటీసులు జారీ చేసిన నేపథ్యంలో నిన్న ఖమ్మం–వరంగల్ జాతీయ రహదారిపై బీఆర్ఎస్ నేతలు, కార్యకర్తలు నిరసనకు దిగిన విషయం తెలిసిందే. ఈ నిరసనలో భాగంగా రహదారిని దిగ్బంధించడం వల్ల వాహనాల రాకపోకలకు తీవ్ర అంతరాయం ఏర్పడిందని పోలీసులు పేర్కొన్నారు.
నిరసన సమయంలో పోలీసుల సూచనలను పట్టించుకోకుండా ఆందోళన కొనసాగించారని, శాంతిభద్రతలకు విఘాతం కలిగిందని పోలీసులు ఆరోపిస్తున్నారు. ఈ ఘటనలో మాజీ మంత్రి ఎర్రబెల్లి దయాకర్ రావు నాయకత్వంలోనే నిరసన జరిగిందని ఎఫ్ఐఆర్లో పేర్కొన్నారు.
ఈ కేసులపై బీఆర్ఎస్ నేతలు స్పందిస్తూ, ఇది రాజకీయ కక్షతో నమోదు చేసిన కేసు అని ఆరోపిస్తున్నారు. ప్రజాస్వామ్య పద్ధతిలో నిరసన తెలిపితే అక్రమ కేసులు పెడుతున్నారని విమర్శిస్తున్నారు. మరోవైపు పోలీసులు చట్టప్రకారం చర్యలు తీసుకున్నామని స్పష్టం చేశారు. కేసు దర్యాప్తు కొనసాగుతోంది.
Also Read:Budget 2026: బడ్జెట్ హైలైట్స్