గద్దర్ అవార్డులకు దరఖాస్తుల ఆహ్వానం

గద్దర్ అవార్డుల ప్రదానానికి సంబంధించి ఫిల్మ్ డెవలప్మెంట్ కార్పొరేషన్ (ఎఫ్‌డీసీ) అధికారికంగా ఉత్తర్వులు జారీ చేసింది. 2025 సంవత్సరానికి గద్దర్ అవార్డులు అందజేయనున్నట్లు ప్రకటించింది. ఈ అవార్డులు 2025 జనవరి 1 నుంచి 2025 డిసెంబర్ 31 మధ్య కాలంలో నిర్మించి, విడుదలైన చిత్రాలకు వర్తిస్తాయని ఎఫ్‌డీసీ స్పష్టం చేసింది. తెలంగాణ రాష్ట్ర సినీ పరిశ్రమలో సృజనాత్మక ప్రతిభను గుర్తించి ప్రోత్సహించాలనే ఉద్దేశంతో ఈ అవార్డులను నిర్వహిస్తున్నట్లు తెలిపింది.

సినీ పరిశ్రమలోని మొత్తం 17 విభాగాల్లో గద్దర్ అవార్డులకు దరఖాస్తులను ఆహ్వానిస్తున్నట్లు ఫిల్మ్ డెవలప్మెంట్ కార్పొరేషన్ ప్రకటించింది. ఉత్తమ చిత్రం, దర్శకుడు, నటుడు, నటి, సాంకేతిక విభాగాలతో పాటు ఇతర కీలక విభాగాల్లోనూ అవార్డులు ప్రదానం చేయనున్నట్లు పేర్కొంది. అంతేకాదు, వ్యక్తిగత విభాగాల్లోనూ గద్దర్ అవార్డులకు దరఖాస్తులు స్వీకరించనున్నట్లు వెల్లడించింది.

రేపటి నుంచి ఈ నెల 31వ తేదీ వరకు గద్దర్ అవార్డుల దరఖాస్తుల స్వీకరణ కొనసాగుతుందని ఎఫ్‌డీసీ తెలియజేసింది. అర్హత కలిగిన నిర్మాతలు, దర్శకులు, కళాకారులు, సాంకేతిక నిపుణులు ఈ అవకాశాన్ని వినియోగించుకోవాలని సూచించింది. దరఖాస్తు విధానం, అవసరమైన పత్రాలు, మార్గదర్శకాలకు సంబంధించిన పూర్తి వివరాలను త్వరలో అధికారికంగా వెల్లడించనున్నట్లు ఫిల్మ్ డెవలప్మెంట్ కార్పొరేషన్ పేర్కొంది.

Also Read:ఏ తప్పు చేయలేదు..భయపడేది లేదు!