అత్యంత తీవ్రమైన చర్మ క్యాన్సర్ రకమైన ‘మెలనోమా’ చికిత్సలో మోడెర్నా , మెర్క్ సంస్థలు సంయుక్తంగా అభివృద్ధి చేసిన “పర్సనలైజ్డ్ mRNA క్యాన్సర్ వ్యాక్సిన్” మూడవ దశ ప్రయోగాల్లో అత్యుత్తమ ఫలితాలను సాధించింది. మెర్క్ సంస్థకు చెందిన ఇమ్యునోథెరపీ ఔషధం ‘కిట్రూడా’తో కలిపి ఈ వ్యాక్సిన్ను అందించినప్పుడు క్యాన్సర్ తిరగబెట్టడం, ఇతర అవయవాలకు వ్యాపించడం గణనీయంగా తగ్గినట్లు పరిశోధకులు గుర్తించారు.
సాధారణ వ్యాక్సిన్లు ఇన్ఫెక్షన్లు రాకుండా ముందస్తుగా రక్షణ ఇస్తే, పర్సనలైజ్డ్ క్యాన్సర్ వ్యాక్సిన్లు రోగి యొక్క క్యాన్సర్ కణాల జన్యు విశేషాల ఆధారంగా తయారవుతాయి. శస్త్రచికిత్స ద్వారా క్యాన్సర్ కణజాలాన్ని (ట్యూమర్) తొలగించిన తర్వాత దానిలోని జన్యు ఉత్పరివర్తనాలను విశ్లేషిస్తారు. ఆ ఆధారంగా వ్యాధిగ్రస్తుడి శరీరంలోని రోగనిరోధక వ్యవస్థను సక్రియం చేసి, క్యాన్సర్ కణాలను గుర్తించి నాశనం చేసేలా ఈ ‘ఇంటిస్మెరాన్ ఆటోజీన్’ వ్యాక్సిన్ను డిజైన్ చేస్తారు.
‘INTerpath-001’ అని పిలిచే ఈ మూడవ దశ క్లినికల్ ట్రయల్స్లో 1,137 మంది మెలనోమా బాధితులు పాల్గొన్నారు. ‘కిట్రూడా’ ఔషధాన్ని ఒక్కదానినే ఇచ్చిన గ్రూప్తో పోలిస్తే, ‘కిట్రూడా + పర్సనలైజ్డ్ mRNA వ్యాక్సిన్’ కాంబినేషన్ పొందిన రోగుల్లో క్యాన్సర్ మళ్లీ తిరగబెట్టకుండా ఉండే కాలం మరియు శరీరం అంతటా వ్యాపించకుండా ఉండే కాలం మెరుగ్గా ఉన్నట్లు గుర్తించారు.
Also Read:ఇరాన్కు సాయం చేస్తే..ట్రంప్ వార్నింగ్!
ఈ కాంబినేషన్ వల్ల ఎలాంటి కొత్త దుష్ప్రభావాలు వెలుగుచూడలేదని, ఇది పూర్తి సురక్షితమైనదని సంస్థలు ధృవీకరించాయి. క్యాన్సర్ చికిత్సలో ఒక mRNA ఆధారిత వ్యక్తిగత చికిత్సా పద్ధతి ప్రయోగాల్లో విజయవంతం కావడం ప్రపంచంలో ఇదే తొలిసారి. మునుపటి ‘KEYNOTE-942’ అధ్యయనంలో 5 ఏళ్లపాటు రోగుల ఆరోగ్యాన్ని పరిశీలించినప్పుడు కూడా ఈ వ్యాక్సిన్ క్యాన్సర్ తిరగబెట్టే ప్రమాదాన్ని, మరణాల శాతాన్ని తగ్గించినట్లు తేలింది. త్వరలోనే ఈ వివరాలను అంతర్జాతీయ వైద్య సదస్సులో సమర్పించి, ఆమోదం కోసం నియంత్రణ సంస్థలను ఆశ్రయించనున్నట్లు కంపెనీలు వెల్లడించాయి.