తన నటనతో టాలీవుడ్‌లో నేచురల్ స్టార్‌గా పేరు తెచ్చుకున్న హీరో నాని. ఎలాంటి బ్యాగ్రౌండ్ లేకుండే కేవలం టాలెంటునే నమ్ముకుని ఈ స్థాయికి రావడానికి నాని చాలా కష్టపడ్డాడు. అందుకే అన్ని వర్గాల ప్రేక్షకులు మెచ్చే హీరో అయ్యాడు. తన యాక్టింగ్ టాలెంట్ తో ”నేను లోకల్” లాంటి రొటీన్ స్టోరీతో కూడా మంచి హిట్ కొట్టి తన మార్కెట్ పెంచుకున్నాడు. ఇదే స్పీడ్‌లో తర్వాత సినిమాలు చకచకా చేసేందుకు సిద్ధమైపోతున్నాడు. ప్రస్తుతం నాని చేసిన లేటెస్ట్ సినిమా ”నిన్ను కోరి” విడుదలకు సిద్ధంగా ఉంది. ఈ సినిమా జులై 7న రిలీజ్ కానుంది. శివ నిర్వాణ దర్శకత్వంలో నానికి జంటగా నివేదా థామస్ హీరోయిన్‌గా చేస్తుంది
అయితే నాని మరో సినిమాకు శ్రీకారం రెఢీ అవుతున్నాడు. వెంకటాద్రి ఎక్స్ ప్రెస్ – ఎక్స్ ప్రెస్ రాజా సినిమాలతో వరస హిట్లు కొట్టిన మేర్లపాక గాంధీ డైరెక్షన్ లో నటించేందుకు నాని పచ్చజెండా ఊపాడు. ఈ సినిమాలో విశేషం ఎంటంటే.. నాని ఈ సినిమాతో మరోసారి డ్యూయల్ రోల్ చేయబోతున్నాడు. గతంలో జెండాపై కపిరాజు – జెంటిల్ మేన్ మూవీల్లో నాని ద్విపాత్రాభినయం చేశాడు. ఇప్పుడు ముచ్చటగా మూడోసారి రెండు పాత్రల్లో అలరించబోతున్నాడు. మేర్లపాక గాంధీ గత సినిమాలలాగే ఈ సినిమా కూడా రొమాంటిక్ ఎంటర్ టెయినర్ గా తెరకెక్కనుంది.
నిన్ను కోరి విడుదలకు సిద్దంగా ఉండగానే..నాని ప్రస్తుతం ఎంసీఏ సినిమా షూటింగ్ లో బిజీగా ఉన్నాడు. వేణు శ్రీరామ్ డైరెక్షన్ లో వస్తున్న ఈ మూవీలో మళయాళ ప్రేమమ్ బ్యూటీ సాయి పల్లవి హీరోయిన్ గా నటిస్తోంది. దిల్ రాజు ప్రొడక్షన్స్ లో వస్తున్న ఈ చిత్రాన్ని నవంబర్ నాటికి థియేటర్లకు తీసుకురావాలని భావిస్తున్నారు. ఎంసీఏ షూటింగ్ పూర్తయిన వెంటనే మేర్లపాక గాంధీ సినిమా స్టార్ట్ చేయనున్నారు.ఇప్పుడు నేచురల్ స్టార్ నాని సినిమాల వేగం మరికాస్త పెంచాడన్నమాట.
