తెరాసాలో చేరిన నామా నాగేశ్వరరావు..

టీడీపీకి, పొలిట్‌బ్యూరో పదవికి రాజీనామా చేసిన నామా నాగేశ్వర్‌రావు ఇవాళ టీఆర్‌ఎస్ పార్టీలో చేరారు. టీఆర్‌ఎస్ వర్కింగ్ ప్రెసిడెంట్ కేటీఆర్ సమక్షంలో నామా నాగేశ్వర్‌రావు కారెక్కారు.. ఈ సందర్భంగా నామా నాగేశ్వర్‌రావుకు కేటీఆర్ గులాబీ కండువా కప్పి పార్టీలోకి ఆహ్వానించారు. నామాతో పాటు టీటీడీపీ రాష్ట్ర ఉపాధ్యక్షురాలు స్వర్ణ కుమారి, అమర్ నాథ్, ఖమ్మం జిల్లా టీడీపీ అధ్యక్షుడు బ్రహ్మయ్య, మంచిర్యాల జిల్లా టీడీపీ అధ్యక్షుడు శరత్ బాబు టీఆర్ఎస్ లో చేరారు.

ఈ కార్యక్రమంలో మంత్రి శ్రీనివాస్‌గౌడ్, ఖమ్మం ఎమ్మెల్యే పువ్వాడ అజయ్‌తో పాటు పలువురు నాయకులు పాల్గొన్నారు. మరోవైపు, నామా నాగేశ్వరరావుకు ఖమ్మం లోక్ సభ స్థానాన్ని ఖరారు చేసే అవకాశం ఉంది. కాగా తెలంగాణ శాసనసభ ఎన్నికల్లో ఖమ్మం నియోజకవర్గం నుంచి కాంగ్రెస్‌ మద్దతుతో టీడీపీ తరఫున పోటీ చేసిన నామా నాగేశ్వరరావు ఆ ఎన్నికల్లో పరాజయం పొందిన సంగతి తెలిసిందే.