మలయాళ సూపర్‌ స్టార్‌ మోహన్ లాల్ కథానాయకుడిగా మలయాళంలో ‘మరక్కర్’ అనే సినిమా రూపొందింది. అత్యధిక భారీ బడ్జెట్‌తో ఆంటోని పెరంబవూర్ ఈ సినిమాను నిర్మించారు. ప్రియదర్శన్ ఈ సినిమాకి దర్శకుడిగా వ్యవహరించారు. సునీల్ శెట్టి, యాక్షన్ కింగ్ అర్జున్, ప్రభు, కీలకమైన పాత్రలను పోషించారు. ఇక ముఖ్యమైన పాత్రల్లో కీర్తి సురేశ్, మంజు వారియర్, సుహాసిని, కల్యాణి ప్రియదర్శన్ కనిపించనున్నారు. మోహన్ లాల్ తనయుడు ప్రణవ్ కూడా ఈ సినిమాలో నటించడం విశేషం.
కేరళ తీరప్రాంతాన్ని ఆక్రమించడానికి పోర్చుగీసువారు ప్రయత్నించినప్పుడు వారిని ఎదిరించిన ‘కుంజలి మరక్కర్’ అనే యోధుడి కథ ఇది. చారిత్రక నేపథ్యం కలిగిన ఈ సినిమాను క్రితం ఏడాదిలోనే విడుదల చేయాలనుకున్నారు. కానీ కరోనా కారణంగా వీలుపడలేదు. కాగా, ఈ సినిమాను ‘ఓనమ్’ పండుగ సందర్భాన్ని పురస్కరించుకుని, ఆగస్టు 12వ తేదీన విడుదల చేయనున్నట్టు తాజాగా అధికారికంగా ప్రకటించింది చిత్ర బృందం. అందుకు సంబంధించిన రిలీజ్ డేట్ పోస్టర్‌ను కూడా విడుదల చేశారు.
