హైద‌రాబాద్‌లో మెగా కొవిడ్‌ టీకా కార్యక్రమం ప్రారంభం..

32
Mega vaccination drive

హైద‌రాబాద్‌ నగరంలో అతిపెద్ద కొవిడ్‌ వ్యాక్సినేషన్‌ డ్రైవ్‌ ప్రారంభమైంది. హైటెక్‌ ఎగ్జిబిషన్‌ గ్రౌండ్‌లో మెగా కొవిడ్‌ టీకా కార్యక్రమం ఉదయం ప్రారంభించారు. ఒకేచోట 40 వేల మందికి వ్యాక్సిన్‌ వేయాలనే లక్ష్యంతో ఈ డ్రైవ్‌ చేపట్టారు. 18 ఏళ్లు నిండిన వారంద‌రికీ వ్యాక్సిన్ వేస్తున్నారు. తెలంగాణ రాష్ట్ర ప్రభుత్వం, సైబరాబాద్‌ సెక్యూరిటీ కౌన్సిల్‌ ఆధ్వర్యంలో మెడికవర్‌ దవాఖానలు ఈ వ్యాక్సినేషన్‌ డ్రైవ్‌ను ప్రతిష్టాత్మకంగా నిర్వహిస్తున్నాయి.

ఈ రోజు ఉదయం 8 గంటలకు ప్రారంభ‌మైన ఈ వ్యాక్సినేషన్‌ డ్రైవ్‌ సాయంత్రం 6 గంటల వరకు కొనసాగనుంది. ఇందుకు కోసం హైటెక్స్‌లో మొత్తం 3 హాళ్లలో 300 టేబుళ్లను ఏర్పాటు చేశారు. డ్రైవ్‌ ప్రారంభించిన తొలిగంటలోనే 5 వేల మందికి వ్యాక్సిన్‌ వేసినట్లు నిర్వాహకులు తెలిపారు. వ్యాక్సిన్‌ కోసం జనాలు భారీగా తరలిరావడంతో ట్రాఫిక్‌ స్తంభించింది. రద్దీ నియంత్రణకు పోలీసులు చర్యలు తీసుకుంటున్నారు.