జాతీయస్థాయిలో ఉత్తమ కథా చిత్రాల దర్శకుడిగా పేరు తెచ్చుకున్నారు మణిరత్నం. చెలియా సినిమాతో ఫ్లాప్‌ ఇచ్చినా మణిరత్నం నుంచి సినిమాలు వస్తున్నాయంటే ప్రేక్షకులు ఆసక్తిగా ఎదురుచూస్తుంటారు. ప్రస్తుతం కుటుంబకథా నేపథ్యంగా సాగే ఓ మల్టీస్టారర్ చిత్రాన్ని రూపొందిస్తున్న సంగ‌తి తెలిసిందే.
శింబు, అరవింద్ స్వామి, అరుణ్ విజయ్, విజయ్ సేతుపతి, జ్యోతిక, అదితి రావ్ హైద‌రీ, ఐశ్వ‌ర్య‌రాజేష్‌, ప్రకాష్ రాజ్, జయసుధ త‌దిత‌రులు ముఖ్య పాత్ర‌లు పోషిస్తున్న ఈ చిత్రానికి శుక్ర‌వారం తెలుగు, త‌మిళ భాష‌ల్లో టైటిల్స్‌ను ప్ర‌క‌టించారు. తెలుగులో ‘నవాబ్’ పేరుని.. త‌మిళంలో ‘చెక్క చివంద వాణం’ అనే పేరుని నిర్ణ‌యించారు.
ఈ సినిమా ఫస్ట్ లుక్ పోస్టర్‌ని విడుదల చేశారు మణిరత్నం. అరవింద్ స్వామి, సిలంబరసన్, అరుణ్ విజయ్, విజయ్ సేతుపతి ఉన్నారు. మణిరత్నం సొంత సంస్థ అయిన మద్రాసు టాకీస్ బ్యానర్ పై ఈ సినిమాను రూపొందిస్తున్నారు. ఈ చిత్రంలో జ్యోతిక, జయసుధ, ప్రకాష్ రాజ్, త్యాగరాజన్, అదితిరావ్ హైదరి, మోడల్ దయానా ఎర్రప్ప, మన్సూర్ అలీ ఖాన్ నటిస్తున్నారు. ఏఆర్ రెహమాన్ సంగీతం అందిస్తున్నారు. ఫిబ్రవరి 12 నుంచి సెట్స్ పైకి వెళ్లనుండగా ఈ ఏడాదిలోనే సినిమా తెర‌పైకి రానుంది.
