ప్రముఖ పుణ్యక్షేత్రం తిరుమలలో ఇవాళ ఘనంగా కోయిల్ ఆళ్వార్ తిరుమంజనం జరగనుంది. సంవత్సరంలో నాలుగుసార్లు ఉగాది, ఆణివార ఆస్థానం, బ్రహ్మోత్సవాలు, వైకుంఠ ఏకాదశి సందర్భాల్లో కోయిల్ ఆళ్వార్ తిరుమంజనం నిర్వహిస్తుంటారు. ఇందులో భాగంగా జనవరి 2 నుండి 11వ తేదీ వరకు వైకుంఠ ఏకాదశి ఉత్సవాలు జరగనున్న నేపథ్యంలో ఇవాళ కోయిల్ ఆళ్వార్ తిరుమంజనం జరుగనుంది.
ఆనందనిలయం మొదలుకొని బంగారువాకిలి వరకు, శ్రీవారి ఆలయం లోపల ఉప దేవాలయాలు, ఆలయ ప్రాంగణం, పోటు, గోడలు, పైకప్పు, పూజాసామగ్రి తదితర వస్తువులను నీటితో శుభ్రంగా కడుగుతారు. ఈ సమయంలో స్వామివారి మూలవిరాట్టును వస్త్రంతో పూర్తిగా కప్పుతారు. శుద్ధి అనంతరం నామకోపు, శ్రీచూర్ణం, కస్తూరి పసుపు, పచ్చాకు, గడ్డ కర్పూరం, గంధం పొడి, కుంకుమ, కిచిలిగడ్డ తదితర సుగంధ ద్రవ్యాలు కలగలిపిన పవిత్ర పరిమళ జలాన్ని ఆలయమంతటా ప్రోక్షణం చేస్తారు.
అనంతరం భక్తులను సర్వదర్శనానికి అనుమతిస్తారు. కోయిల్ ఆళ్వార్ తిరుమంజనం సందర్భంగా బ్రేక్ దర్శనాలను దేవస్థానం రద్దు చేసింది.
ఇవి కూడా చదవండి..
