గత రెండేళ్లకు పైగా ప్రపంచాన్ని వణికిస్తున్న రష్యా-ఉక్రెయిన్ యుద్ధంలో అనూహ్య పరిణామం చోటుచేసుకుంది. ఇరు దేశాల మధ్య మూడు రోజుల పాటు కాల్పుల విరమణ (Ceasefire) ఒప్పందం కుదిరినట్లు అమెరికా అధ్యక్షుడు డొనాల్డ్ ట్రంప్ అధికారికంగా ప్రకటించారు. ఈ పరిణామం ప్రపంచవ్యాప్తంగా శాంతి ఆశలను చిగురింపజేస్తోంది.
ఈ ఒప్పందం ప్రకారం, నేటి నుండి మే 11వ తేదీ వరకు ఇరు దేశాల మధ్య అన్ని రకాల సైనిక కార్యకలాపాలు నిలిచిపోనున్నాయి. రష్యా జరుపుకునే ‘విక్టరీ డే’ (మే 9) సందర్భాన్ని పురస్కరించుకుని, ఉద్రిక్తతలను తగ్గించే ఉద్దేశంతో వ్లాదిమిర్ పుతిన్ మరియు వోలోడిమిర్ జెలెన్స్కీ ఈ నిర్ణయం తీసుకున్నారు.
ఖైదీల మార్పిడి: మానవతా దృక్పథంతో ఇరుపక్షాలు చెరో 1,000 మంది యుద్ధ ఖైదీలను విడుదల చేయడానికి అంగీకరించాయి. ఇది యుద్ధం ప్రారంభమైనప్పటి నుండి జరిగిన అతిపెద్ద ఖైదీల మార్పిడిలో ఒకటిగా నిలవనుంది.
ఈ చారిత్రాత్మక ఒప్పందం కుదర్చడంలో కీలక పాత్ర పోషించిన డొనాల్డ్ ట్రంప్, పుతిన్ మరియు జెలెన్స్కీల చొరవను కొనియాడారు. శాంతి చర్చలు సఫలం కావడానికి సహకరించిన పుతిన్, జెలెన్స్కీలకు నా అభినందనలు. మనం యుద్ధం ముగింపుకు చాలా దగ్గరగా ఉన్నాం. ఈ మూడు రోజుల విరామం శాశ్వత శాంతికి పునాది కావాలి అన్నారు డోనాల్డ్ ట్రంప్.
ప్రస్తుతానికి ఇది మూడు రోజుల తాత్కాలిక ఒప్పందమే అయినప్పటికీ, దీనిని శాశ్వత శాంతి ఒప్పందంగా మార్చేందుకు తెర వెనుక ప్రయత్నాలు ముమ్మరంగా జరుగుతున్నాయి. అంతర్జాతీయ సమాజం కూడా ఈ పరిణామాన్ని స్వాగతిస్తూ, యుద్ధం పూర్తిగా ముగిసి ప్రాణనష్టం ఆగిపోవాలని ఆకాంక్షిస్తోంది.
Also Read:దేశ ఆత్మగౌరవానికి నిదర్శనం..సోమనాథ్ ఆలయం