జియోఫోన్ నెక్ట్స్.. జియో స్మార్ట్‌ఫోన్‌ వచ్చేసింది..

ప్రముఖ టెలికం దిగ్గజం రిలయన్స్ నుంచి జియో కొత్త 5G స్మార్ట్‌ఫోన్‌ వచ్చేసింది. గురువారం జరిగిన రిలయన్స్ 44వ వార్షిక సర్వసభ్య సమావేశంలో ఈ కొత్త 5G స్మార్ట్ ఫోన్‌ను రిలయన్స్ లాంచ్ చేసింది. దీనికి జియోఫోన్ నెక్ట్స్ అనే పేరు పెట్టారు. ఇది ఆండ్రాయిడ్ స్పెష‌ల్ వెర్ష‌న్‌పై ప‌ని చేయ‌నుంది. గ‌తంలో జియోఫోన్‌, జియోఫోన్ 2 అనే రెండు ఫీచ‌ర్ ఫోన్ల‌ను లాంచ్ చేసిన జియో.. తొలిసారి పూర్తి ఫీచ‌ర్ల‌తో ఓ స్మార్ట్‌ఫోన్‌ను లాంచ్ చేసింది. ఈ ఫోన్ వ‌చ్చే వినాయ‌క చ‌వితి అంటే సెప్టెంబ‌ర్ 10 నుంచి మార్కెట్‌లోకి రానుంది. కోవిడ్ నేపథ్యంలో గతేడాది మాదిరిగానే ఈసారి కూడా డిజిటల్ మోడ్‌లోనే ఈవెంట్ నిర్వహించారు.

ఈ సమావేశంలో రిలయన్స్ చైర్మన్ ముకేష్‌ అంబానీ మాట్లాడుతూ.. గూగుల్, జియో సంయుక్తంగా అభివృద్ధి చేసిన ‘JIO PHONE NEXT 5G’ ఫోన్‌ను సెప్టెంబర్ 10న అందుబాటులోకి తీసుకురానున్నట్టు ప్రకటించారు. తమ కంపెనీలో గూగుల్ 7.7 శాతం వాటాను 33,737 కోట్లతో పెట్టుబడి పెట్టినట్టు వెల్లడించారు. గూగుల్‌, జియో అందించే అన్ని అప్లికేష‌న్ల‌ను ఇది స‌పోర్ట్ చేస్తుందని అన్నారు.

ప్రస్తుత జియో 4G స్మార్ట్ ఫోన్ల కంటే సరికొత్త ఫీచర్లతో జియో 5G ఫోన్ యూజర్లను ఆకట్టుకోనుంది. ప్రస్తుత 5G స్మార్ట్ ఫోన్ల కంటే ఈ కొత్త జియో స్మార్ట్ ఫోన్ చాలా సరసమైన ధరకే అందుబాటులో రానుంది. దీని ధర మార్కెట్లో రూ.5వేల లోపే ఉండొచ్చునని అంచనా. 4G స్మార్ట్ ఫోన్ల కంటే కూడా రేటు చాలా తక్కువగా ఉండే అవకాశం ఉంది.

ఇందులో ఆపరేటింగ్ సిస్టమ్, ముఖ్యంగా భారత స్మార్ట్ ఫోన్ మార్కెట్ కోసం డెవలప్ చేసింది. ఇందులో వాయిస్ అసిస్టెంట్, స్క్రీన్ టెక్స్ట్ , ఆటోమేటిక్ రీడ్, ట్రాన్స్‌లేషన్, ఆగ్మెంటెడ్ రియాలిటీ ఫిల్టర్‌లతో స్మార్ట్ కెమెరా ఫీచర్స్ యూజర్లను ఆకట్టుకునేలా ఉన్నాయి. కొత్త జియో 5G స్మార్ట్ ఫోన్‌లో ఎలాంటి ఫీచర్లు ఉంటాయంటే.. మినిమం స్పెషిఫికేషన్లతో జియో 5G స్మార్ట్ ఫోన్ ఉందని తెలుస్తోంది.

ఈ కొత్త ఆపరేటింగ్ సిస్టమ్ JioOSపేరుతో రానుంది. రిలయన్స్ జియో బుక్ ల్యాప్ టాప్ లో LTE కనెక్టవిటీ ఫీచర్ తో పాటు క్వాల్ కమ్ స్నాప్ డ్రాగన్ 665 పవర్ తో పనిచేయనుంది. గూగుల్ స్పెషల్ ఆండ్రాయిడ్ 10 వెర్షన్ ఆపరేటింగ్ సిస్టమ్‌తో పనిచేయనుంది. ఇప్పటివరకు ఇండియాలోనే కాదు, ప్రపంచవ్యాప్తంగా అత్యంత తక్కువ ధర కలిగిన స్మార్ట్‌ఫోన్‌గా జియో 5G స్మార్ట్ ఫోన్ నిలవనుంది.