ఎన్టీఆర్‌ త్రిపాత్రాభినయం చేసిన ‘జై లవకుశ’ చిత్రం బాక్సాఫీసు వద్ద సందడి చేస్తోంది. గురువారం ప్రేక్షకుల ముందుకు వచ్చిన ఈ చిత్రం ప్రముఖుల, విమర్శకుల ప్రశంసలు అందుకుంది. కాగా ఈ చిత్రం అమెరికా బాక్సాఫీసు వద్ద అద్భుతమైన ఓపెనింగ్స్‌ రాబట్టినట్లు సినీ విశ్లేషకుడు తరణ్‌ ఆదర్శ్‌ ట్వీట్‌ చేశారు. యూఎస్‌ఏ బాక్సాఫీసు వద్ద 18వ స్థానంలో నిలిచినట్లు పేర్కొన్నారు. బుధవారం 168 లొకేషన్లలో ప్రదర్శించిన (ప్రీమియర్‌ షోలు) ఈ చిత్రం 560,699 డాలర్లు (రూ. 3.64 కోట్లు) రాబట్టినట్లు ట్వీట్‌ చేశారు.
ఈ చిత్రం దేశవ్యాప్తంగా రూ.24 కోట్లు వసూలు చేసినట్లు సమాచారం. వారాంతానికి చిత్రం రూ.100 కోట్ల క్లబ్‌కు చేరువయ్యే అవకాశాలు ఉన్నట్లు సినీ విశ్లేషకులు అంచనా వేస్తున్నారు. ఎన్టీఆర్‌ ‘జనతా గ్యారేజ్‌’ ప్రపంచ వ్యాప్తంగా రూ. 134 కోట్లు రాబట్టింది. ఈ చిత్రం వసూళ్లను ‘జై లవకుశ’ అధిగమించి, ఎన్టీఆర్‌ సినీ కెరీర్‌లో కొత్త రికార్డును సృష్టించేలా కనిపిస్తోందని విశ్లేషకులు చెబుతున్నారు.
దేవిశ్రీ ప్రసాద్ సంగీతం ఆడియన్స్ ను ఆకట్టుకోవడం రాశిఖన్నా గ్లామర్ ప్రత్యేక ఆకర్షణగా నిలవడం ఇలా ఈ సినిమాకి అన్నీ కలిసొచ్చాయని అంటున్నారు. బాబీ ‘జై లవకుశ’ చిత్రానికి దర్శకత్వం వహించారు. నివేదా థామస్‌, రాశీఖన్నా కథానాయికలుగా నటించారు. ఎన్టీఆర్‌ ఆర్ట్స్‌ పతాకంపై కల్యాణ్‌రామ్‌ నిర్మించారు.
