న్యూజిలాండ్‌తో జరుగుతున్న టీ20 సిరీస్‌లో భారత జట్టుకు ఎదురుదెబ్బ తగిలింది. స్టార్ బ్యాటర్ ఇషాన్ కిషన్ గాయం కారణంగా రెండో టీ20 మ్యాచ్‌కు దూరమయ్యాడు. తొలి టీ20లో ఆడుతున్న సమయంలో అతడి కుడి తొడ కండరానికి స్వల్ప గాయం కావడంతో ఈ నిర్ణయం తీసుకున్నారు. ఇషాన్ తిరిగి జట్టులోకి ఎప్పుడు వస్తాడనే విషయంపై ఇంకా స్పష్టత రాలేదు.
ఈ విషయాన్ని భారత క్రికెట్ నియంత్రణ మండలి (బీసీసీఐ) సోషల్ మీడియా వేదికగా వెల్లడించింది. తొలి టీ20లో ఇషాన్ కిషన్‌కు కుడి తొడ కండరానికి స్వల్పస్థాయి గాయమైందని, దీంతో రెండో టీ20కి అతడు అందుబాటులో ఉండడని తెలిపింది. ప్రస్తుతం బీసీసీఐ వైద్య బృందం అతడి ఆరోగ్య పరిస్థితిని పర్యవేక్షిస్తోందని పేర్కొంది. అయితే, కోలుకోవడానికి ఎంత సమయం పడుతుందనే వివరాలను వెల్లడించలేదు.
ఈ సిరీస్‌లో భాగంగా అక్టోబర్ 22న క్రైస్ట్‌చర్చ్‌లోని హాగ్లీ ఓవల్ మైదానంలో తొలి టీ20 మ్యాచ్ జరిగింది. టాస్ గెలిచిన భారత జట్టు తొలుత బౌలింగ్ ఎంచుకుంది. మొదట బ్యాటింగ్ చేసిన న్యూజిలాండ్ భారీ స్కోరు సాధించింది. ఫిన్ అలెన్ 24 బంతుల్లో 45 పరుగులు చేయగా, గ్లెన్ ఫిలిప్స్ అజేయంగా 82 పరుగులతో చెలరేగాడు.
Also Read:కిరణ్ అబ్బవరం..’భజ గోవిందం’
బెవన్ జాకబ్స్ 31 పరుగులు చేయడంతో న్యూజిలాండ్ నిర్ణీత ఓవర్లలో 225 పరుగులు చేసింది. 226 పరుగుల భారీ లక్ష్యంతో బరిలోకి దిగిన భారత్‌కు అభిషేక్ శర్మ, సంజూ శాంసన్ ఇన్నింగ్స్ ప్రారంభించారు. అభిషేక్ 29 పరుగులు చేయగా, సంజూ శాంసన్ 67 పరుగులతో కీలక ఇన్నింగ్స్ ఆడాడు. అనంతరం శ్రేయస్ అయ్యర్ 28 బంతుల్లో 42 పరుగులు చేశాడు. చివర్లో నామన్ ధీర్ కేవలం 15 బంతుల్లోనే అజేయంగా 42 పరుగులు చేసి జట్టును విజయతీరాలకు చేర్చాడు.