చర్చల నుండి తప్పుకున్న ఇరాన్!

పాకిస్థాన్‌లో జరగాల్సిన ‘సీజ్‌ఫైర్ 2.0’ (Ceasefire 2.0) చర్చల నుండి తప్పుకుంటున్నట్లు ఇరాన్ సంచలన ప్రకటన చేసింది. అమెరికా వైఖరిని నిరసిస్తూ ఇరాన్ తీసుకున్న ఈ నిర్ణయం అంతర్జాతీయంగా ఉత్కంఠ రేపుతోంది.

అమెరికాతో ఇస్లామాబాద్‌లో జరగాల్సిన రెండో రౌండ్ చర్చల్లో తాము పాల్గొనడం లేదని ఇరాన్ ప్రభుత్వ మీడియా వెల్లడించింది. ప్రస్తుత కాల్పుల విరమణ గడువు ముగియడానికి కొద్దిరోజుల ముందే ఈ నిర్ణయం తీసుకోవడం ఉద్రిక్తతలకు దారితీస్తోంది.

వాషింగ్టన్ అవాస్తవిక డిమాండ్లు చేస్తోందని మరియు తన నిర్ణయాలను మాటిమాటికీ మారుస్తోందని ఇరాన్ ఆరోపించింది.ఇరాన్ ఓడరేవుల చుట్టూ అమెరికా కొనసాగిస్తున్న నౌకాదళ దిగ్బంధం (Naval Blockade) కాల్పుల విరమణ ఒప్పందాన్ని ఉల్లంఘించడమేనని ఇరాన్ పేర్కొంది.

ఇరాన్ ఉపాధ్యక్షుడు మొహమ్మద్ రెజా ఆరిఫ్ అమెరికా తీరును తీవ్రంగా విమర్శించారు. ఒకవైపు శాంతి గురించి మాట్లాడుతూనే, మరోవైపు ఒత్తిడిని పెంచుతూ అమెరికా పరస్పర విరుద్ధమైన సంకేతాలను పంపుతోందని ఆయన మండిపడ్డారు. ఇలాంటి గందరగోళ పరిస్థితుల్లో అర్థవంతమైన చర్చలు జరపడం కష్టమని ఆయన స్పష్టం చేశారు.అమెరికా అధ్యక్షుడు డొనాల్డ్ ట్రంప్ ఈ చర్చలపై ఆశాభావం వ్యక్తం చేసిన కొద్దిసేపటికే ఇరాన్ ఈ నిర్ణయం తీసుకోవడం గమనార్హం.

ఒకవేళ ఒప్పందం కుదరకపోతే ఇరాన్‌లోని విద్యుత్ కేంద్రాలు, వంతెనలు వంటి కీలక మౌలిక సదుపాయాలపై దాడులు చేస్తామని ట్రంప్ హెచ్చరించారు. ఇరాన్ అణు కార్యక్రమం, ప్రాంతీయ ఆధిపత్యం మరియు వ్యూహాత్మక హార్ముజ్ జలసంధిపై నియంత్రణ వంటి అంశాలపై ఇరు దేశాల మధ్య తీవ్ర విభేదాలు కొనసాగుతున్నాయి.

Also Read;ప్రశాంత్ నీల్ ప్రజెంట్స్..418!

ప్రస్తుతం హార్ముజ్ జలసంధి వద్ద ఉద్రిక్తతలు తారస్థాయికి చేరుకున్నాయి. ప్రపంచ చమురు సరఫరాకు అత్యంత కీలకమైన ఈ మార్గంలో నౌకలు నిలిచిపోవడంతో, గ్లోబల్ ఎనర్జీ సప్లైపై ఇది తీవ్ర ప్రభావం చూపే అవకాశం ఉంది.చర్చలు విఫలమవ్వడం మరియు ట్రంప్ హెచ్చరికల నేపథ్యంలో, పశ్చిమ ఆసియాలో యుద్ధ మేఘాలు మళ్ళీ కమ్ముకుంటున్నాయి.