ఇండిగో ఎయిర్ లైన్స్ చెందిన ఒ ఉద్యోగి కరోనాతో మృతి చెందాడు. తమ సిబ్బందిలో ఒకరు కరోనా వైరస్‌ సోకి చెన్నైలో ప్రాణాలు కోల్పోయారని భారత విమానయాన సంస్థ ఇండిగో తెలిపింది. అయితే, ఈ విషయంపై ఆ సంస్థ ఎటువంటి వివరాలు వెల్లడించలేదు. మీడియాకు తెలిసిన వివరాల ప్రకారం.. ప్రాణాలు కోల్పోయిన ఆ వ్యక్తి విమాన నిర్వహణ ఇంజనీరుగా పనిచేస్తున్నాడు. శుక్రవారం అతడు ప్రాణాలు కోల్పోయాడు. సుమారు 50 ఏళ్ళ వయసున్న ఈ ఉద్యోగి 2006 నుంచే ఈ ఎయిర్ లైన్స్ సంస్థలో పని చేస్తున్నాడట. చెన్నైలోని ఇతని కుటుంబానికి ఎయిర్ లైన్స్ తీవ్ర సంతాపం తెలిపింది.
దేశంలో ఓ విమానయాన సంస్థలో పని చేసే ఒక ఎంప్లాయీ మరణించడం ఇదే మొదటిసారి. ‘మా విమానయాన సంస్థలో పనిచేస్తోన్న ఓ వ్యక్తి చెన్నైలో కొవిడ్‌-19తో మృతి చెందినందుకు విచారం వ్యక్తం చేస్తున్నాం’ అని ఇండిగో ప్రతినిధి ఒకరు మీడియాకు తెలిపారు. ‘ఇండిగో సిబ్బంది అందరికీ ఇది చాలా బాధ కలిగించే విషయం. ఈ బాధాకర సమయంలో ఆయన కుటుంబానికి అండగా నిలబడతాం. ఆయన కుటుంబం వివరాలు తెలపకుండా గోప్యతను పాటిస్తాం’ అని ఇండిగో ప్రతినిధి ఒకరు తెలిపారు.
