బాస‌ర ట్రిపుల్ ఐటీలో నెల‌కొన్న డిమాండ్ల‌ను ప‌రిష్క‌రించాల‌ని మీరు చేసిన ఉద్య‌మం త‌న‌కెంతో న‌చ్చింద‌ని రాష్ట్ర ఐటీ, పుర‌పాల‌క శాఖల మంత్రి కేటీఆర్ అన్నారు. ఇవాళ బాస‌ర ట్రిపుల్ ఐటీని సంద‌ర్శించిన సంద‌ర్భంగా కేటీఆర్ ఈ వ్యాఖ్య‌లు చేశారు.ఈ కార్యక్రమంలో సబితా ఇంద్రారెడ్డి ఇంద్రకరణ్‌రెడ్డి శ్రీనివాస్‌గౌడ్‌ వర్సిటీ విద్యార్థులతో సమావేశమయ్యారు.
క్యాంపస్‌ ఆడిటోరియంలో ఏర్పాటు చేసిన సమావేశంలో కేటీఆర్ మాట్లాడుతూ… మీ స‌మ‌స్య‌ల‌పై ఆందోళన చేస్తున్నప్పుడు ప్రతీ రోజు పేపర్లు, టీవీల్లో చూశాను. రాజకీయాలకు అతీతంగా స్టూడెంట్ గవర్నెన్స్ కౌన్సిల్ సహకారంతో మీ సమస్యలను మీరు పరిష్కరించుకున్నారు. మీరు ఎంచుకున్న పద్దతి నాకు నచ్చింది. గాంధీ సత్యాగ్రహ పద్దతిలో శాంతియుతంగా, వానలో కూడా బయట కూర్చోని కొట్లాడిన పద్దతి నాకు చాలా బాగా నచ్చింది. కేవలం సమస్యల కోసం ఆందోళన చేసిన మీరు అందులో రాజకీయ పార్టీలకు తావు ఇవ్వకపోవడం నచ్చింది. సర్కార్ దృష్టిని ఆకర్షించడానికే ఆందోళన చేస్తున్నామని చెప్పారు. అందుకు అభినందనలు చెబుతున్నాను అని కేటీఆర్ పేర్కొన్నారు.
