దేశవ్యాప్తంగా పలు భాషల్లో నటిస్తూ విలక్షణ నటుడిగా మంచి గుర్తింపు సంపాదించుకున్నారు వెర్స‌టైల్ హీరో రానా దగ్గుబాటి. ఆయన ప్రధాన పాత్ర పోషించిన చిత్రం అరణ్య. ప్రభు సాల్మోన్ ద‌ర్శ‌క‌త్వంలో రూపొందిన ఈ సినిమాలో విష్ణు విశాల్, జోయా హుస్సేన్, శ్రీయా పింగోల్కర్‌ కీలక పాత్రలు పోషించారు. ఈరోస్‌ ఇంటర్‌నేషనల్‌ సంస్థ ప్ర‌తిష్టాత్మ‌కంగా నిర్మించిన ఈ మూవీ మార్చి26న తెలుగు, తమిళం, హిందీ భాషల్లో విడుదలవుతుంది. హిందీలో హాథీమేరేసాథీ, తమిళంలో కాదన్‌ అనే టైటిల్స్‌తో ప్రేక్షకుల ముందుకురానుంది. ఈ సంద‌ర్భంగా వెర్స‌టైల్ హీరో రానా దగ్గుబాటి ఇంట‌ర్వ్యూ.
మ్యాన్, యానిమ‌ల్ కాన్‌ఫ్లిక్ట్ తో..
– ఈ సినిమా డైరెక్టర్‌ ప్రభు సాల్మాన్‌ తీసిన కుమ్కి కథలో ఏనుగు ఒక పార్టు మాత్రమే. ఆ తర్వాత కాలంలో ఏనుగులు, అడవుల గురించి బాగా పరిశోధన చేసిన ప్రభు అరణ్య కథను రెడీ చేశారు. ఈ కథ చెబుతున్న‌ప్పుడే అడివి గురించి ఫ‌స్ట్ టైమ్ నాకు అంత డీటైల్డ్‌గా అర్ధం అయ్యింది. ఒక మ్యాన్ యానిమ‌ల్ కాన్‌ఫ్లిక్ట్ తో సాగే చిత్ర‌మిది. ఇలాంటి సినిమా చేయాలనిపించి అరణ్య కథను ఒప్పుకున్నాను.
భవిష్యత్‌ తరాలకు మేలు చేసే కథ..
– సినిమాల్లో హీరోగా రాజ్యాలు, ప్రేమల కోసం యుద్ధాలు చేశాం. ఈ సినిమాలో మన భూమి కోసం, భవిష్యత్‌ తరాల కోసం ఎంటైర్ సోసైటీ మీదే వార్‌కి రెడీ అయిన ఒక వ్యక్తి కథ అనగానే నాకు ఎగ్జైటింగ్‌గా అనిపించింది. ఏనుగుల వల్ల అడవుల విస్తీర్ణం పెరుగుతుంది. అది మన భవిష్యత్‌ తరాలకు మేలు చేస్తుంది. అందుకే అరణ్య భవిష్యత్‌ తరాల కథ.
ఆ విజువ‌ల్ ఊహించుకోండి..
– ఈ సినిమా షూటింగ్ కోసం 15రోజులు ముందుగానే థ్యాయ్‌లాండ్‌కు వెళ్లాం. అక్కడి అడవుల్లో మాకు కావాల్సిన లొకేషన్స్‌ కోసం సెర్చ్‌ చేశాం. ఏనుగుల పార్క్స్‌లో షూటింగ్ చేసుకునేందుకు వీలుగా ఏర్పాట్లు చేసుకున్నాం. ఈ కథ గురించి ప్రభు చెప్పినప్పుడు 18 ఏనుగులతో షూట్‌ చేయాల్సి ఉంటుంది అన్నారు. అందుకే ముందుగా ఏనుగులతో సాన్నిహిత్యం పెంచుకునేందుకు రేంజర్స్‌ (ఏనుగుల సంరక్షులు) పర్యవేక్షణలో శిక్షణ తీసుకున్నాను. సాధారణంగా ఒక ఏనుగు మన పక్కన నడిస్తేనే భూమి కంపిస్తుంది. అలాంటిది ఒకేసారి 18 ఏనుగులు మీ వెన‌క న‌డుస్తూవ‌స్తుంటే ఆ విజువ‌ల్ ఊహించుకోండి. అది ఒక డిఫరెంట్ ఎక్స్పీరియన్స్.
అలా ఏనుగులకు దగ్గరయ్యాను
– ఏనుగులకు ఆహారం ఇవ్వడం, వాటికి స్నానం చేయించడం, వాటితో ఎక్కువసేపు గడపటం వంటి వాటి వల్ల నేను వాటికి దగ్గరయ్యాను. ఇందుకు ఓ వారం టైమ్ పట్టింది. దాంతో తర్వాత షూటింగ్ అంతా బాగానే జరిగింది.
ఆ క్ష‌ణం చాలా భయం వేసింది.
– ఏనుగులుకు దగ్గరయ్యే క్రమంలో ఏదైనా చెడు జరుగుతుందెమో నన్న భయంతో నేను ఒక జేబులో అర‌టిపండు. ఒక‌జేబులో బెల్లంముక్క ఉంచుకునేవాడిని. ఓ సారి జేబులో ఉన్న అరటి పండు కొద్దిగా బ‌య‌ట‌కు వచ్చింది. అది చూసి నా దగ్గర చాలా అర‌టిపండ్లు ఉన్నాయని హఠాత్తుగా అన్ని ఏనుగులు నా దగ్గరకు వచ్చాయి. ఆ క్ష‌ణంలో చాలా భయం వేసింది.
ప్రతిరోజూ ఏనుగుల దగ్గర నుంచి నేను ఏదో ఒకటి నేర్చుకుంటూనే ఉన్నాను..
– ఈ సినిమాలోని నా లుక్‌ కోసం ప్రభు చాలా కష్టపడ్డాడు. ఈ సినిమాలో క్యారెక్టర్ పరంగా నా చేతిలో ఉన్న కర్ర, అడవిలో కనిపించే కుందేలు, జింక ఇతర జీవాలు కూడా సినిమాలో చిన్న క్యారెక్టర్స్‌గా కనిపిస్తాయి. మేజర్‌గా ఇది ఏనుగుల కథ. షూటింగ్‌లో పాల్గొన్న ప్రతిరోజూ ఏనుగుల దగ్గర నుంచి నేను ఏదో ఒకటి నేర్చుకుంటూనే ఉన్నాను. ఈ సినిమాలో యాక్ష‌న్ సీన్స్ చాలా వైల్డ్‌గా, రా గా ఉంటాయి.
అందుకే అరణ్య..
– ఈ సినిమాలో నా క్యారెక్టర్ పేరు నరేంద్రభూపతి. ఫారెస్ట్ మ్యాన్ ఆఫ్ ఇండియా బిరుదువ‌చ్చాక అంద‌రూ అత‌న్ని అరణ్య అని పిలుస్తుంటారు. కాబ‌ట్టి ఈ సినిమాకు అరణ్య టైటిల్‌ పెట్టాము. ఈ సినిమాలో ఫారెస్ట్ మ్యాన్ ఆఫ్ ఇండియాగా పిల‌వ‌బ‌డే జాదవ్ పయెంగ్,ఎలిఫెంట్ విస్పరర్`గా పిల‌వ‌బ‌డే లారెన్స్ ఆంథోనీ జీవితాల్లోని కొన్ని సంఘటనలతో పాటుగా ఘాజీరంగా ఫైట్‌ను ఈ సినిమాలో చూపించాము.
నిజంగా అడివి మ‌ధ్య‌లో ఉన్న ఫీలింగ్ కలుగుతుంది…
– మీ సినిమాలో మీరు చూసేది ఒక అడవి కాదు. మొత్తం ఆరు అడ‌వుల‌లో చిత్రీక‌రించాం. ఒక షాట్‌ థ్యాయ్‌లాండ్‌ ఏలిఫెంట్‌ ఫార్క్‌లో తీస్తే ..ఆ షాట్‌ కంటిన్యూషన్‌ కేరళ అడవుల్లో ఉంటుంది. మరోషాట్‌ కంటిన్యూషన్‌ మహాభళేశ్వరంలో కనిపిస్తుంది. థియేటర్స్‌లో అరణ్య సినిమా చూసేప్పుడు ఆడియన్స్‌కు ఓ డిఫరెంట్ ఎక్స్పీరియన్స్ కలుగుతుంది. ముఖ్యంగా రసూల్‌ ఇచ్చిన సౌండ్‌ థియేటర్స్‌లో బాగుంటుంది. మీరు నిజంగా అడివి మ‌ధ్య‌లో ఉన్న ఫీలింగ్ కలుగుతుంది. ఈ సినిమా కోసం టీమ్‌ అందరు చాలా కష్టపడ్డారు. విష్ణు విశాల్, జోయా, శ్రీయా అందరం కష్టపడి ఓ మంచి సినిమా చేశాం.
ఫ‌స్ట్ న‌మ్మిన వ్య‌క్తులు వాళ్లే..
- ఈ సినిమా మా బాబాయ్‌కి, శేఖ‌ర్ క‌మ్ముల‌గారికి చూపించ‌డానికి రీజ‌న్ ఏంటంటే నేను ఏ క్యారెక్టర్ అయినా చేయ‌ల‌గ‌ల‌ను అని ఫ‌స్ట్ న‌మ్మిన వ్య‌క్తులు వాళ్లే.. ఈ సినిమాలో నేను బాగా చేయ‌గ‌లిగాను అనే గ‌ర్వంతో ఈ సినిమా ప్ర‌త్యేకంగా వారికి చూపించాను.
క‌థ‌గా చెప్పినా న‌మ్మేవాణ్ణి కాదేమో..
- ఇన్ని వెరైటీ క‌థ‌ల‌ను చేసే నేనే ఇలా లాక్‌డౌన్ వ‌స్తుంది అని క‌థ‌గా చెప్పినా న‌మ్మేవాణ్ణి కాదేమో.. పోస్ట్ క‌రోనా మ‌నుషులు, వాళ్ల ఆలోచ‌న‌ల‌లో చాలా మార్పు తెచ్చింది. ప్రస్తుతం గ్లోబ‌ల్ సినిమాలు ఎక్క‌డ తీస్తారు అంటే హైద‌రాబాద్‌లోనే తీస్తాం అనే స్థాయికి డెఫినెట్‌గా వ‌చ్చాం.
ఆ అవ‌కాశం రావ‌డం అదృష్టం..
– నేను నా కేరీర్‌లో అమితాబ్‌గారు, అజిత్ గారిలాంటి డిఫరెంట్ యాక్ట‌ర్స్‌తో ఎన్నో యూనిక్ చిత్రాల్లో న‌టించే అవ‌కాశం రావ‌డం అదృష్టంగా భావిస్తున్నాను.
పవన్‌కల్యాణ్‌గారు చాలా కూల్ మ‌రియు డౌన్‌ టు ఎర్త్ ప‌ర్స‌న్‌…
- ప్రస్తుతం ‘విరాటపర్వం’ చేస్తున్నాను. అది హ్యూమ‌న్ డ్రామాతో ముడిప‌డిన ఒక బ్యూటిఫుల్ లవ్‌స్టోరీ. తర్వాత మలయాళ ‘అయ్యప్పనుమ్ కోషియమ్‌’ తెలుగు రీమేక్‌ చేస్తున్నాను. పవన్‌కల్యాణ్‌గారు చాలా కూల్ మ‌రియు డౌన్‌ టు ఎర్త్ ప‌ర్స‌న్‌. ఆయ‌న‌తో వ‌ర్క్ చేస్తున్న‌ప్పుడు ప్ర‌తి రోజు ఏదో ఒక కొత్త విష‌యం నేర్చ‌కుంటూ వ‌స్తున్నాను. పవన్ గారు ఒరిజిన‌ల్ మ్యాన్, ఒరిజిన‌ల్ థింక‌ర్‌. ఆ సినిమాను గురించిన ఎక్స్‌పీరియన్సెస్ ఆ సినిమా టైమ్‌లో తప్పకుండా ప‌వ‌న్‌గారి పక్కన కూర్చుని మాట్లాడతాను. పవన్ గారు వెరీ వెరీ ఎంక‌రేజింగ్ ప‌ర్స‌న్‌.
నాలో చాలా పెద్ద మార్పు తెచ్చింది..
- అరణ్య సినిమా నాలో చాలా పెద్ద మార్పు తెచ్చింది. అడవి నుంచి వచ్చిన తర్వాత నేను పెళ్లిచేసుకోవడం దానికి ఒక నిదర్శనం (నవ్వుతూ).
