ఐపీఎల్ 2022లో నేడు సూపర్ శాటర్ డేలో భాగంగా ఆసక్తికర పోరు జరగనుంది. కోల్‌కతా నైట్‌రైడర్స్- గుజరాత్ టైటాన్స్ జట్లు తలపడనున్నాయి, మరికాసేపట్లో ప్రారంభం కానున్న ఈ మ్యాచ్‌లో టాస్ గెలిచిన టైటాన్స్.. కోల్‌కతాను బ్యాటింగ్‌కు ఆహ్వానించింది. గుజరాత్ ఒకే ఒక్క మార్పుతో బరిలోకి దిగుతోంది. గత మ్యాచ్‌కు దూరమైన కెప్టెన్ హార్దిక్ పాండ్యా తిరిగి జట్టులోకి వచ్చాడు. విజయ్‌ బెంచ్‌కు పరిమితమయ్యాడు. కోల్‌కతా జట్టులో మూడు మార్పులు జరిగాయి. టిమ్ సౌథీ, శామ్ బిల్లింగ్స్, రింకు సింగ్ జట్టులోకి వచ్చారు.
ఇక పాయింట్ల పట్టికలో రెండో స్థానంలో ఉన్న గుజరాత్ నేటి మ్యాచ్‌లో విజయం సాధిస్తే 12 పాయింట్లతో అగ్రస్థానానికి చేరుకుంటుంది. కోల్‌కతా ప్రస్తుతం ఏడో స్థానంలో ఉంది. ఈ మ్యాచ్‌లో గెలవడం ద్వారా స్థానాన్ని మెరుగుపరుచుకోవాలని నైట్ రైడర్స్ పట్టుదలగా ఉంది. అలాగే ఈరోజు మరో పోరులో రాత్రి ఏడున్నర గంటలకు రాయల్ చాలెంజర్స్ బెంగళూరు-సన్‌రైజర్స్ హైదరాబాద్ జట్లు తలపడతాయి.
తుది జట్లు:
కోల్‌కతా నైట్ రైడర్స్ : వెంకటేష్ అయ్యర్, సునీల్ నరైన్, శ్రేయాస్ అయ్యర్ (కెప్టెన్), సామ్ బిల్లింగ్స్, నితీష్ రాణా, ఆండ్రీ రస్సెల్, రింకు సింగ్, టిమ్ సౌథీ, ఉమేష్ యాదవ్, శివమ్ మావి, వరుణ్ చక్రవర్తి
గుజరాత్ టైటాన్స్ : వృద్ధిమాన్ సాహా, శుభమాన్ గిల్, హార్దిక్ పాండ్యా (కెప్టెన్), డేవిడ్ మిల్లర్, రాహుల్ తెవాటియా, అభినవ్ మనోహర్, రషీద్ ఖాన్, లాకీ ఫెర్గూసన్, అల్జెరీ జోసెఫ్, మహమ్మద్ షమీ, యశ్ దయాల్
