అట్లాంటా స్టేడియంలో జరిగిన 2026 సెమీ-ఫైనల్లో ఇంగ్లాండ్పై 2-1 తో ఉత్కంఠభరిత విజయాన్ని నమోదు చేసింది అర్జెంటీనా. లియోనెల్ స్కలోని నేతృత్వంలోని అర్జెంటీనా జట్టు ఆట ముగిసే సమయానికి ఒక గోల్ వెనుకబడి ఉన్నప్పటికీ….చివరి నిమిషాల్లో ఎంజో ఫెర్నాండెజ్, లౌటారో మార్టినెజ్ గోల్స్ సాధించడంతో ప్రస్తుత ఛాంపియన్లు మరోసారి ప్రపంచ కప్ ఫైనల్కు చేరుకున్నారు. ఫైనల్లో స్పెయిన్తో తలపడనుంది అర్జెంటీనా.
ఆట 55వ నిమిషంలో ఆంథోనీ గోర్డాన్ గోల్ చేయడంతో ఈ టోర్నమెంట్లో ఫైనల్ చేరాలనే ఇంగ్లాండ్ సుదీర్ఘ నిరీక్షణకు తెరపడేలా కనిపించింది. మోర్గాన్ రోజర్స్ బంతిని ముందుకు తీసుకెళ్లగా, పెనాల్టీ ఏరియాలోకి అందిన చక్కటి పాస్ను గోర్డాన్ ఎటువంటి అడ్డంకి లేకుండా చాలా దగ్గరి నుండి గోల్గా మలిచాడు.థామస్ టూఖెల్ నేతృత్వంలోని ఇంగ్లాండ్ జట్టు తొలుత ప్రత్యర్థిపై ఒత్తిడి పెంచుతూ అర్జెంటీనా దాడిని అడ్డుకుంది. హ్యారీ కేన్, జూడ్ బెల్లింగ్హామ్, రోజర్స్ ఇంగ్లాండ్ బంతిని తమ ఆధీనంలో ఉంచుకోవడానికి సహాయపడగా మొదటి భాగంలో అర్జెంటీనా స్పష్టమైన అవకాశాలను సృష్టించలేకపోవడంతో జోర్డాన్ పిక్ఫోర్డ్కు పెద్దగా పరీక్ష ఎదురుకాలేదు.
చివరకు 86వ నిమిషంలో అర్జెంటీనాకు బ్రేక్థ్రూ లభించింది. పెనాల్టీ ఏరియా వెలుపల బంతిని అందుకున్న ఫెర్నాండెజ్ కొట్టిన అద్భుతమైన స్ట్రైక్ పిక్ఫోర్డ్ను దాటుకుని టాప్ కార్నర్కు చేరింది. దీంతో స్కోరు సమం కావడంతో పాటు మ్యాచ్పై పట్టు అర్జెంటీనా వైపు తిరిగింది. ఇంగ్లాండ్ జట్టు అదనపు సమయం (ఎక్స్ట్రా టైమ్) కోసం రక్షణాత్మక ఆట ఆడుతుండగా, అర్జెంటీనా తన దాడులను కొనసాగించింది. స్టాపేజ్ టైమ్లో మెక్ అలిస్టర్ కొట్టిన బంతి మరోసారి పోస్ట్కు తగలగా, కుడి వైపున లూజ్ బాల్ను అందుకోవడంలో మెస్సీ అత్యంత వేగంగా స్పందించాడు. మెస్సీ సిక్స్-యార్డ్ బాక్స్లోకి ఖచ్చితమైన క్రాస్ అందించగా ప్రత్యామ్నాయ ఆటగాడిగా వచ్చిన మార్టినెజ్ హెడర్ ద్వారా బంతిని గోల్ పోస్ట్లోకి పంపి విజయాన్ని పూర్తి చేశాడు.
Also Read:కేంద్రమంత్రి కుమారస్వామితో కేటీఆర్ భేటీ
చివరి క్షణాల్లో ఇంగ్లాండ్ ఇవాన్ టోనీ, మార్కస్ రాష్ఫోర్డ్లను రంగంలోకి దించి అర్జెంటీనా పెనాల్టీ ఏరియాలోకి వరుస పాస్లను పంపినప్పటికీ డిఫెండింగ్ ఛాంపియన్లు 10 నిమిషాల కంటే ఎక్కువ అదనపు సమయంలో పటిష్టంగా నిలబడ్డారు. దీంతో విజయం అర్జెంటీనా వైపుకు మళ్లింది.