భారత్‌తో జరుగుతున్న టీ20 సిరీస్‌లో న్యూజిలాండ్‌కు మరో ఎదురుదెబ్బ తగిలింది. ఆ జట్టు ఫాస్ట్ బౌలర్ లాకీ ఫెర్గూసన్ మిగిలిన టీ20 మ్యాచ్‌లకు దూరమయ్యాడు. అతడి స్థానంలో మాథ్యూ ఫిషర్‌ను జట్టులోకి తీసుకున్నారు. మరోవైపు, గాయాల కారణంగా టీ20 సిరీస్‌కు దూరమైన మాట్ హెన్రీ, కైల్ జేమీసన్ నవంబర్ 4 నుంచి ప్రారంభమయ్యే వన్డే సిరీస్‌కు అందుబాటులోకి వచ్చే అవకాశం ఉంది.
ఫెర్గూసన్ భారత్‌తో జరిగిన తొలి రెండు టీ20ల్లో ఆడాడు. క్రైస్ట్‌చర్చ్‌లో జరిగిన రెండో మ్యాచ్ సందర్భంగా అతడి కుడి కాలి కండరంలో నొప్పి మొదలైంది. అనంతరం నిర్వహించిన స్కానింగ్‌లో స్వల్పస్థాయి కండరాల చీలిక ఉన్నట్లు నిర్ధారణ అయిందని న్యూజిలాండ్ క్రికెట్ (NZC) వెల్లడించింది. అతడు తిరిగి మైదానంలోకి రావడానికి మరో వారం రోజులు లేదా అంతకంటే ఎక్కువ సమయం పట్టవచ్చని తెలిపింది.
ఫెర్గూసన్ స్థానంలో జట్టులోకి వచ్చిన మాథ్యూ ఫిషర్ ఇప్పటికే టీ20 జట్టుతో చేరాడు. తొలుత మూడో టీ20కి మాత్రమే ఎంపికైన అతడిని, సిరీస్‌లో మిగిలిన మ్యాచ్‌లకు కూడా కొనసాగించాలని నిర్ణయించారు. ఫిషర్ స్థానంలో న్యూజిలాండ్-ఏ జట్టుకు రెండో మ్యాచ్ కోసం ఫాస్ట్ బౌలర్ బ్రెట్ రాండెల్‌ను ఎంపిక చేశారు.
Also Read:అమాంతం పడిపోయిన గూగుల్ షేర్లు
మాట్ హెన్రీ, కైల్ జేమీసన్ కూడా గాయాల కారణంగా మిగిలిన టీ20లకు దూరమయ్యారు. రెండో టీ20 సందర్భంగా హెన్రీ కుడి తొడ కండరంలో నొప్పితో బాధపడ్డాడు. స్కానింగ్‌లో స్వల్పస్థాయి కండరాల చీలిక బయటపడటంతో కోలుకోవడానికి ఒకటి నుంచి రెండు వారాల సమయం పట్టవచ్చని వైద్యులు అంచనా వేశారు.
జేమీసన్ ప్రస్తుతం వెల్లింగ్టన్‌లోనే ఉండనున్నాడు. శనివారం జరిగే ఫోర్డ్ ట్రోఫీ రెండో రౌండ్ మ్యాచ్‌లో కాంటర్‌బరీ తరఫున ఆడిన అనంతరం సోమవారం న్యూజిలాండ్ జట్టుతో చేరి వన్డే సిరీస్‌కు సిద్ధమవుతాడు. ఇప్పటికే ఐదు టీ20ల సిరీస్‌ను భారత్ 3-0తో కైవసం చేసుకుంది. మిగిలిన రెండు టీ20లు అక్టోబర్ 30న ఆక్లాండ్‌లో, నవంబర్ 1న హామిల్టన్‌లో జరగనున్నాయి. అనంతరం నవంబర్ 4 నుంచి ఐదు మ్యాచ్‌ల వన్డే సిరీస్ ప్రారంభం కానుంది.