ఫ్యాటీ లివర్..లక్షణాలివే!

ఫ్యాటీ లివర్ డిసీజ్ (కాలేయంలో కొవ్వు పేరుకుపోవడం) ప్రస్తుతం వేగంగా పెరుగుతున్న జీవనశైలి వ్యాధుల్లో ఒకటి. దీన్ని నిపుణులు ‘సైలెంట్ డిసీజ్’ అని పిలుస్తారు. ఎందుకంటే ప్రారంభ దశలో స్పష్టమైన లక్షణాలు కనిపించవు. కాలేయంలో మొత్తం బరువులో సుమారు 5–10 శాతం కంటే ఎక్కువ కొవ్వు పేరుకుపోయినప్పుడు మాత్రమే శరీరం అసౌకర్యాన్ని సూచించడం మొదలుపెడుతుంది. అంతేకాదు, కాలేయానికి నొప్పి నరాలు లేకపోవడం వల్ల సమస్య తీవ్ర స్థాయికి చేరేవరకు చాలామందికి తెలియదు.

నిపుణుల అధ్యయనాల ప్రకారం, ముఖ్యంగా అనారోగ్యకరమైన ఆహారపు అలవాట్లు, శారీరక చలనం లేకపోవడం, ఇన్సులిన్ నిరోధకత ఫ్యాటీ లివర్‌కు ప్రధాన కారణాలు. శరీరం ఇన్సులిన్‌ను సరిగ్గా వినియోగించుకోలేని పరిస్థితిలో, రక్తంలో ఉన్న అదనపు చక్కెర కాలేయంలో కొవ్వుగా మారి నిల్వ అవుతుంది. దీని వల్ల కాలేయ పనితీరు క్రమంగా తగ్గుతుంది.

ఫ్యాటీ లివర్ ఉన్నవారిలో కడుపు భాగంలో భారంగా అనిపించడం, కుడివైపు పైభాగంలో స్వల్ప నొప్పి లేదా అసౌకర్యం, ఎప్పుడూ అలసటగా ఉండటం, ఆకలి తగ్గడం, జీర్ణ సమస్యలు వంటి లక్షణాలు కనిపించవచ్చు. ఈ సంకేతాలను నిర్లక్ష్యం చేయకుండా తొలిదశలోనే జీవనశైలిలో మార్పులు చేసుకుంటే, ఆహార నియంత్రణ, వ్యాయామం ద్వారా ఫ్యాటీ లివర్‌ను అదుపులోకి తీసుకురావచ్చని వైద్యులు సూచిస్తున్నారు.

Also Read:కొత్త అల్లుడికి పసందైన విందు!