అమ్మవారి దయతో విజయం సాధిస్తా-బాబూమోహన్‌

వచ్చే ఎన్నికల్లో తాను పోటీ చేస్తానని, తన గెలుపు ఖాయమని బీజేపీ నేత, ప్రముఖ నటుడు బాబూమోహన్ ధీమా వ్యక్తం చేశారు. తెలంగాణలో ముందస్తు ఎన్నికల వల్ల రాజకీయంగా గందరగోళ పరిస్థితులు ఏర్పడ్డాయని బాబూమోహన్‌ అన్నారు. ఈరోజు విజయవాడ కనకదుర్గ అమ్మవారిని ఆయన దర్శించుకున్నారు. ఆలయంలో ప్రత్యేక పూజలు చేసిన అనంతరం అర్చకులు ఆయనకు వేదాశీర్వచనాలు అందజేశారు.

ఈ సందర్బంగా బాబూమోహన్‌ మీడియాతో మాట్లాడుతూ.. తెలంగాణ అసెంబ్లీని రద్దు చేయడం, ఆ వెంటనే 105 మంది అభ్యర్థులను ప్రకటించడంతో తెరాసలోనే గందరగోళం మొదలైందని అన్నారు. ఈసారి ఎన్నికల్లో పోటీ చేస్తానని.. అమ్మవారి దయతో తప్పకుండా విజయం సాధిస్తానని ఆయన ధీమా వ్యక్తం చేశారు. ఆలయ పరిసరాల్లో బాబూమోహన్‌తో కరచాలనం చేసేందుకు, ఫోటోలు దిగేందుకు భక్తులు పోటీపడ్డారు.