ఎగ్జిట్‌ పోల్స్ అంచనాలు నిజమయ్యేనా?

వెస్ట్ బెంగాల్‌లో హంగ్ వచ్చే అవకాశం ఉందని ఎగ్జిట్ పోల్స్ అంచనా వేయగా, అస్సాం మరియు పుదుచ్చేరిలలో ఎన్డీఏ (NDA) ఆధిక్యంలో ఉన్నట్లు తెలుస్తోంది. తమిళనాడులో డీఎంకే ప్లస్ కూటమి విజయం సాధిస్తుందని, కేరళలో యూడీఎఫ్ (UDF) తిరిగి అధికారంలోకి వస్తుందని అంచనాలు వెలువడ్డాయి.

పశ్చిమ బెంగాల్‌లో ఈసారి ఎన్నికలు ఉత్కంఠభరితంగా మారనున్నాయి. ఎగ్జిట్ పోల్స్ భిన్నమైన అంచనాలను ఇచ్చాయి. కొన్ని సంస్థలు బీజేపీకి ఆధిక్యం ఇస్తుండగా, మరికొన్ని మమతా బెనర్జీ నేతృత్వంలోని తృణమూల్ కాంగ్రెస్ వరుసగా నాలుగోసారి స్పష్టమైన మెజారిటీతో అధికారంలోకి వస్తుందని పేర్కొంటున్నాయి. 2011 నుండి అధికారంలో ఉన్న మమత పాలనకు చరమగీతం పాడాలని బీజేపీ గట్టిగా ప్రయత్నిస్తోంది. ఆ పార్టీ నేత సువేందు అధికారి రాష్ట్రంలో సుమారు 180 సీట్లు గెలుస్తామని ధీమా వ్యక్తం చేస్తున్నారు.

అస్సాం: బీజేపీ నేతృత్వంలోని ఎన్డీఏ వరుసగా మూడోసారి అధికారంలోకి రావడం ఖాయంగా కనిపిస్తోంది. 126 స్థానాలున్న అసెంబ్లీలో ఎన్డీఏ 85-95 సీట్లు గెలుచుకునే అవకాశం ఉండగా, కాంగ్రెస్ కూటమి 25-32 స్థానాలకే పరిమితం కానుంది.

కేరళ: ఇక్కడ కాంగ్రెస్ నేతృత్వంలోని యూడీఎఫ్‌కు సానుకూల పవనాలు వీస్తున్నాయి. 140 స్థానాలకు గాను యూడీఎఫ్ 70-75 సీట్లు, ఎల్డీఎఫ్ (LDF) 60-65 సీట్లు సాధించే అవకాశం ఉంది. 2024 పార్లమెంటు ఎన్నికల జోరును కొనసాగించాలని చూస్తున్న ఎన్డీఏ 3 నుండి 5 స్థానాలు గెలుచుకోవచ్చు.

తమిళనాడు: ముఖ్యమంత్రి ఎంకే స్టాలిన్ నేతృత్వంలోని డీఎంకే కూటమి వరుసగా రెండోసారి అధికారాన్ని చేపట్టనుంది. 234 స్థానాల్లో డీఎంకే కూటమి 122-132 సీట్లు, ఏఐఏడీఎంకే నేతృత్వంలోని ఎన్డీఏ 87-100 సీట్లు సాధించవచ్చు. నటుడు విజయ్ స్థాపించిన తమిళగ వెట్రి కళగం (TVK) 10-12 సీట్లు గెలిచి కొన్ని చోట్ల ఫలితాలను ప్రభావితం చేసే అవకాశం ఉంది.

Also Read:విద్వేషపూరిత ప్రసంగాలపై సుప్రీం!

పుదుచ్చేరి: ఇక్కడ ఎన్డీఏ (ఆల్ ఇండియా ఎన్ఆర్ కాంగ్రెస్ + బీజేపీ) 16-20 సీట్లతో తిరిగి అధికారాన్ని దక్కించుకోనుంది. ఇండియా (INDIA) కూటమి 6-8 స్థానాలకు పరిమితం కావచ్చు. అయితే ఎగ్జిట్ పోల్స్ అంచనాలు ఏ మేరకు నిజం అవుతాయోనన్న ఉత్కంఠ మాత్రం అందరిలో నెలకొంది.