బాలీవుడ్‌ భామ దిశా పటానీ తన అందం అభినయంతో ప్రేక్షకులను అలరిస్తోంది. ఈ అమ్మడు టాలీవుడ్‌లో వరుణ్‌ తేజ్‌ హీరోగా పూరి జగన్నాథ్‌ దర్శకత్వంలో రూపొందిన ‘లోఫర్‌’ సినిమాలో నటించింది. ఆ సినిమా ఫ్లాప్‌ అవడంతో మళ్ళీ తెలుగు తెరపై కన్పించలేదు. అయితే, ఆ ఒక్క సినిమాతో ఆమె టాలెంట్‌ని లైట్‌ తీసుకోవడానికి వీల్లేదు. దిశా మంచి డాన్సర్‌.. అంతేనా, ఆమె యాక్షన్‌ సీక్వెన్సెస్‌లోనూ బాగా చేయగలదు.
ఈ బాలీవుడ్‌ బోల్డ్‌ బ్యూటీకి తాజాగా తమిళ సినిమా ‘సంఘమిత్ర’లో ఛాన్స్‌ కొట్టేసింది. గతంలో శృతిహాసన్‌ వదులుకున్న ఛాన్స్‌ ఇది. చాలామంది హీరోయిన్ల పేర్లు తెరపైకొచ్చాయిగానీ, చివరికి దిశా పటానీని ఫైనల్‌ చేశారు ‘సంఘమిత్ర’ చిత్ర దర్శకుడు సుందర్‌. అత్యంత ప్రతిష్టాత్మకంగా ఈ చిత్రాన్ని నిర్మిస్తున్నారు. ఇదొక ఇండియన్‌ మూవీ.. అనే స్థాయిలో భారీ బడ్జెట్‌తో ‘సంఘమిత్ర’ను నిర్మిస్తున్నట్లు సుందర్‌ గతంలోనే ప్రకటించిన విషయం విదితమే.
అయితే ‘సంఘమిత్ర’లో ఛాన్స్‌ రావడంపై స్పందించిన దిశా పటానీ, ఆ సినిమా కథ గురించి పూర్తిగా విన్నాక, పూర్తి న్యాయం చేయగలననే నమ్మకంతోనే ఓకే చెప్పానంటోందీ ఈ బ్యూటీ. మార్షల్‌ ఆర్ట్స్‌లో తనకున్న ప్రావీణ్యం ఈ సినిమాకి ఉపయోగపడుతాయని సౌత్‌లో ఓ సినిమా చేశాననీ, ఆ సినిమా ఆశించిన గుర్తింపు ఇవ్వలేదనీ, ‘సంఘమిత్ర’తో మాత్రం మంచి విజయం తన ఖాతాలో పడతుందని దిశా చాలా కాన్ఫిడెంట్‌గానే ఉంది.
