ఎన్డీయే కూటమిలోకి దినకరణ్!

తమిళనాడు రాజకీయాల్లో కీలక పరిణామం చోటు చేసుకుంది. అమ్మ మక్కల్ మున్నేట్ర కజగం (AMMK) అధినేత టిటివి దినకరణ్ బుధవారం తన పార్టీ మళ్లీ జాతీయ ప్రజాస్వామ్య కూటమి (NDA) లో చేరుతున్నట్లు అధికారికంగా ప్రకటించారు. ఈ ప్రకటన అనంతరం చెన్నైలో బీజేపీ తమిళనాడు ఎన్నికల ఇన్‌చార్జ్ పీయూష్ గోయల్‌ను ఆయన కలిశారు. గతంలో చీలిపోయిన ఈ భాగస్వామ్యం మళ్లీ పునరుద్ధరించబడటంతో, 2026 అసెంబ్లీ ఎన్నికల ముందే డీఎంకే ఆధిపత్యానికి సవాల్‌గా మారే అవకాశాలు కనిపిస్తున్నాయి.

శక్తివంతమైన థేవర్ వంశ వారసుడైన దినకరణ్, దక్షిణ తమిళనాడులోని థేని, శివగంగై, రామనాథపురం, మదురై వంటి నియోజకవర్గాల్లో ఉన్న ముక్కులథోర్ వర్గాలపై (థేవర్లు, మరవార్లు, అగముడయార్లు) గణనీయమైన ప్రభావం కలిగి ఉన్నారు. ఈ ప్రాంతాలు డీఎంకే ఆధిపత్యాన్ని ఛేదించేందుకు కీలకమైనవిగా రాజకీయ వర్గాలు భావిస్తున్నాయి.

ఎన్‌డీఏలో తిరిగి చేరిన అనంతరం, కేంద్ర హోంమంత్రి అమిత్ షా చొరవతో దినకరణ్–పీయూష్ గోయల్ మధ్య ప్రచార వ్యూహాలపై చర్చలు జరిగాయి. ఎడప్పాడి పళనిస్వామి నేతృత్వంలోని ఏఐఏడీఎంకేతో గత విభేదాలు ఉన్నప్పటికీ, బీజేపీ దక్షిణ భారతంలో తన పట్టు పెంచుకునేందుకు AMMKను కలుపుకుంటోంది.

2024 లోక్‌సభ ఎన్నికల్లో AMMK–ఎన్‌డీఏ కూటమి థేని, తిరుచిరాపల్లి స్థానాల్లో పోటీ చేసి మొత్తం 3,93,415 ఓట్లు సాధించింది. థేని నుంచి పోటీ చేసిన దినకరణ్ 25.65 శాతం ఓట్లతో 2,92,668 ఓట్లు పొందినా, డీఎంకే అభ్యర్థి తంగ తమిళ్ సెల్వన్ చేతిలో ఓటమి పాలయ్యారు.

Also Read:ఓం శాంతి శాంతి శాంతిః.. ఫన్ డ్రామా!