రైల్వే ఉద్యోగాల కోసం భూముల లావాదేవీలకు సంబంధించిన ల్యాండ్–ఫర్–జాబ్ స్కామ్ కేసులో ఆర్జేడీ అధినేత, మాజీ రైల్వే మంత్రి లాలూ ప్రసాద్ యాదవ్తో పాటు ఆయన కుటుంబ సభ్యులపై ఢిల్లీ కోర్టు మళ్లీ క్రిమినల్ చార్జీలను ఫ్రేమ్ చేసింది. లాలూ యాదవ్ కుటుంబం మొత్తం ఒక క్రిమినల్ సిండికేట్లా వ్యవహరించిందని కోర్టు వ్యాఖ్యానించింది. సీబీఐ దాఖలు చేసిన కేసును సమర్థిస్తూ, నియామకాల వెనుక ఒక సమగ్ర కుట్ర (ఓవరార్చింగ్ కన్స్పిరసీ) ఉన్నట్లు కోర్టు స్పష్టం చేసింది.
రౌస్ అవెన్యూ కోర్టులో ఈ కేసును విచారిస్తున్న ప్రత్యేక న్యాయమూర్తి విశాల్ గోగ్నే చార్జీల ఫ్రేమింగ్పై ఉత్తర్వులు జారీ చేశారు. “అనుమానానికి ఉన్న ప్రమాణాల (టచ్స్టోన్ ఆఫ్ సస్పిషన్) ప్రకారం చూస్తే, లాలూ యాదవ్ మరియు ఆయన కుటుంబ సభ్యుల పాత్రతో కూడిన పెద్ద కుట్ర స్పష్టంగా కనిపిస్తోంది” అని ఆయన వ్యాఖ్యానించారు. ఈ దశలో నిందితులపై విచారణ కొనసాగించేందుకు సీబీఐ సమర్పించిన ఆధారాలు సరిపోతాయని కోర్టు అభిప్రాయపడింది.
ఈ కేసును జనవరి 29న తదుపరి విచారణకు వాయిదా వేస్తూ, ఆ రోజున నిందితులు తమపై ఉన్న ఆరోపణలను అంగీకరిస్తారా లేదా అన్నది నమోదు చేస్తామని కోర్టు తెలిపింది. గతంలో డిసెంబర్ 19న, జనవరి 9 ఉదయం 10:30 గంటలకు చార్జీలపై ఉత్తర్వులు ప్రకటిస్తామని కోర్టు వెల్లడించింది.
సీబీఐ సమర్పించిన వివరాల ప్రకారం, ఛార్జ్షీట్లో ఉన్న 103 మంది నిందితుల్లో ఐదుగురు మరణించారు. ఈ కేసులో లాలూ యాదవ్తో పాటు ఆయన భార్య, మాజీ బీహార్ సీఎం రబ్రీ దేవి, కుమారుడు తేజస్వీ యాదవ్ తదితరులపై సీబీఐ ఛార్జ్షీట్ దాఖలు చేసింది.లాలూ యాదవ్ 2004 నుంచి 2009 మధ్య రైల్వే మంత్రిగా ఉన్న సమయంలో, మధ్యప్రదేశ్లోని జబల్పూర్ కేంద్రంగా ఉన్న వెస్ట్ సెంట్రల్ రైల్వే జోన్లో గ్రూప్–డి ఉద్యోగాలను భూముల బదులుగా ఇచ్చారని సీబీఐ ఆరోపించింది. ఆ భూములను లాలూ కుటుంబ సభ్యులు లేదా వారి సన్నిహితుల పేర్లపై బహుమతిగా లేదా బదిలీ చేసినట్లు పేర్కొంది. నియామకాలు నిబంధనలకు విరుద్ధంగా జరిగాయని, ఇవి బెనామీ లావాదేవీలకు సమానమని సీబీఐ వాదించింది. అయితే, నిందితులు ఈ ఆరోపణలను ఖండిస్తూ, ఇది పూర్తిగా రాజకీయ ప్రేరణతో పెట్టిన కేసు అని చెబుతున్నారు.
Also Read:అగ్రికల్చర్ యూనివర్సిటీలో ప్రశ్నాపత్రం లీక్!