ఎల్‌పీజీ ధర పెంపుపై ఠాగూర్ ఫైర్

వాణిజ్య అవసరాలకు ఉపయోగించే ఎల్‌పీజీ (LPG) సిలిండర్ ధరలను భారీగా పెంచుతూ కేంద్ర ప్రభుత్వం తీసుకున్న నిర్ణయంపై కాంగ్రెస్ పార్టీ తీవ్రస్థాయిలో మండిపడింది. ఈ ధరల పెంపును ఉద్దేశించి కాంగ్రెస్ ఎంపీ మాణిక్యం ఠాగూర్ కేంద్రంపై విమర్శలు గుప్పించారు.

ఏప్రిల్ 29న ఓటింగ్ ప్రక్రియ ముగియగానే, మే 1వ తేదీన ధరలను పెంచడాన్ని మాణిక్యం ఠాగూర్ ఎత్తిచూపారు. “ప్రజలు ఏప్రిల్ 29న ఓటు వేశారు, మే 1న వారికి ధరల పెంపు బహుమతిగా లభించింది” అని ఆయన ఎద్దేవా చేశారు.కమర్షియల్ సిలిండర్ ధర ఏకంగా రూ. 993 పెరగడం వల్ల సామాన్య ప్రజలపై పరోక్షంగా భారం పడుతుందని ఆయన ఆవేదన వ్యక్తం చేశారు. హోటళ్లు, రెస్టారెంట్లలో ధరలు పెరిగి, చివరకు సామాన్యుడి జేబుకే చిల్లు పడుతుందని విమర్శించారు.

బీజేపీ ప్రభుత్వం ఎన్నికల సమయంలో ఒకలా, ఎన్నికలు ముగియగానే మరోలా ప్రవర్తిస్తుందని ఆయన ఆరోపించారు. ప్రజల కష్టాలను పట్టించుకోకుండా కేవలం కార్పొరేట్ లాభాల కోసమే ప్రభుత్వం పనిచేస్తోందని విమర్శించారు. ఈ మేరకు ఆయన ఎక్స్ (గతంలో ట్విట్టర్) వేదికగా స్పందిస్తూ, ప్రభుత్వ నిర్ణయం పట్ల తీవ్ర నిరసన వ్యక్తం చేశారు.

Also Read:May Day:ప్రపంచ కార్మిక దినోత్సవం

పశ్చిమ బెంగాల్ ఎన్నికల వేళ ఈ ధరల పెంపు అంశం ఇప్పుడు రాజకీయంగా పెను దుమారం రేపుతోంది. విపక్షాలు దీనిని ప్రధానాస్త్రంగా చేసుకుని కేంద్రంపై విమర్శలు సంధిస్తున్నాయి.