దేశంలో చట్టసభల ప్రజాప్రతినిధులపై నమోదైన క్రిమినల్ కేసుల విచారణలో జరుగుతున్న జాప్యంపై సుప్రీంకోర్టు నియమించిన సీనియర్ న్యాయవాది, అమికస్ క్యూరీ విజయ్ హన్సారియా సమర్పించిన 22వ నివేదిక ప్రస్తుతం తీవ్ర చర్చనీయాంశంగా మారింది. ప్రజాప్రతినిధుల నేరచరిత్రకు సంబంధించిన ఈ నివేదికలో పలు దిగ్భ్రాంతికర గణాంకాలను వెల్లడించారు. దేశవ్యాప్తంగా మొత్తం 28 రాష్ట్రాల ముఖ్యమంత్రులలో 14 మంది తీవ్రమైన నేరారోపణలు ఎదుర్కొంటున్నట్లు ఈ నివేదిక స్పష్టం చేసింది.
ఈ జాబితాలో తెలంగాణ ముఖ్యమంత్రి ఎ. రేవంత్ రెడ్డి ఏకంగా 89 క్రిమినల్ కేసులతో దేశంలోనే మొదటి స్థానంలో నిలిచారని నివేదిక పేర్కొంది. ఆయనపై 72 తీవ్రమైన ఐపీసీ సెక్షన్లతో పాటు 160 ఇతర ఐపీసీ సెక్షన్ల కింద అభియోగాలు నమోదయ్యాయి. ఇక ఆంధ్రప్రదేశ్ ముఖ్యమంత్రి నారా చంద్రబాబు నాయుడు 19 క్రిమినల్ కేసులతో ఈ జాబితాలో నాలుగో స్థానంలో ఉన్నారని అమికస్ క్యూరీ వెల్లడించారు.
తెలుగు రాష్ట్రాల శాసనసభ్యుల నేరచరిత్రపై వచ్చిన వివరాలు కూడా ఆందోళన కలిగిస్తున్నాయి. తెలంగాణలోని మొత్తం ఎమ్మెల్యేలలో 68 శాతం మందిపై వివిధ రకాల నేరారోపణలు ఉండగా, వారిలో 49 శాతం మంది తీవ్రమైన క్రిమినల్ కేసులను ఎదుర్కొంటున్నారు. ఆంధ్రప్రదేశ్ శాసనసభ విషయానికి వస్తే, ఏకంగా 79 శాతం మంది ఎమ్మెల్యేలపై నేరారోపణలు ఉన్నాయి; అందులో 56 శాతం మంది తీవ్రమైన అభియోగాలు ఎదుర్కొంటున్నట్లు నమోదైంది.
దేశమంతటా ఎంపీలు, ఎమ్మెల్యేలపై సుమారు 4,192 క్రిమినల్ కేసులు పెండింగ్లో ఉండగా, వాటిలో 519 కేసులు పదేళ్లకు పైగా విచారణ దశలోనే నిలిచిపోవడం గమనార్హం. ప్రజాస్వామ్య వ్యవస్థలో చట్టసభల పవిత్రతను కాపాడేందుకు, రాజకీయనాయకులపై ఉన్న కేసులను త్వరితగతిన పూర్తిచేయాలని నివేదిక సూచించింది. ఈ కేసుల వేగవంతమైన విచారణకు రోజువారీ ప్రాతిపదికన పనిచేసే ప్రత్యేక కోర్టులను ఏర్పాటు చేయాలని అమికస్ క్యూరీ అత్యున్నత న్యాయస్థానాన్ని కోరారు.
Also Read:CWC:కాంగ్రెస్ నేతలపై ఖర్గే అసహనం!