మెగా హీరోలంతా కలిసి ఒకే వేదికపై కలిస్తే ఫ్యాన్స్‌కి పండగే. ఇందులో చిరు,పవన్ కలిసివస్తే ఆ కిక్కే వేరు. తాజాగా మెగా ఫ్యాన్స్‌కి మరోసారి కిక్కించే సందర్భం రాబోతుంది. పవర్‌స్టార్‌ పవన్ కల్యాణ్‌ కథానాయకుడిగా నటిస్తున్న చిత్రం ‘అజ్ఞాతవాసి’. త్రివిక్రమ్‌ శ్రీనివాస్‌ ఈచిత్రానికి దర్శకత్వం వహిస్తున్నారు. వచ్చే వారం ఈ చిత్ర ఆడియో లాంచ్ కార్యక్రమాన్ని హైదరాబాద్‌లోని హెచ్‌ఐసీసీలో ఘనంగా నిర్వహించబోతున్నట్లు సమాచారం.
ఈ ఆడియో వేడుకకు మెగాస్టార్‌ చిరంజీవి ముఖ్య అతిథిగా హాజరుకానున్నట్లు ఉహాగానాలు వినిపిస్తున్నాయి. గతంలో పవన్ నటించిన ‘సర్దార్‌ గబ్బర్‌ సింగ్‌’ ఆడియో లాంచ్ కార్యక్రమానికి చిరంజీవి అతిథిగా హాజరయ్యారు. అదే విధంగా ‘అజ్ఞాతవాసి’ ఆడియో వేడుకకు కూడా వస్తే బాగుంటుందని అభిమానులు వెయ్యి కళ్లతో ఎదురుచూస్తున్నారు. మరోపక్క చిరు ప్రధాన పాత్రలో నటిస్తున్న ‘సైరా నరసింహారెడ్డి’ చిత్రీకరణ ఇటీవల మొదలైంది.
చాలాసార్లు అన్నయ్య ఈ తమ్ముడిపై ప్రేమను కురిపిస్తూనే.. సినిమాలను మానొద్దంటూ చెప్పారు. మరి ఇప్పుడు కూడా అజ్ఞాతవాసి ఆడియో లాంచ్ లో ఆయన తన తమ్ముడికి అదే హితోపదేశం చేస్తారా? అన్న సందేహం అందరిలో నెలకొంది. ఈ నెల 16న అజ్ఞాతవాసి టీజర్‌ను విడుదల చేస్తున్నారు. సంక్రాంతి సందర్భంగా 2018 జనవరి 10న ఈ చిత్రాన్ని ప్రేక్షకుల ముందుకు రానుంది.
