మెగా పవర్ స్టార్ రామ్ చరణ్-సుకుమార్ కాంబినేషన్లో శరవేగంగా తెరకెక్కుతున్న సినిమా రంగస్థలం 1985. తొలుత సంక్రాంతి కానుకగా సినిమాను ప్రేక్షకుల ముందుకు తీసుకురావాలని భావించిన చిత్రయూనిట్ రిలీజ్ డేట్‌ని పోస్ట్ పోన్ చేసినట్లు సమాచారం. సంక్రాంతి కంటే ముందుగానే క్రిస్ మస్ కానుకగా విడుదల చేసేందుకు సన్నాహాలు చేస్తోంది.
ప్రస్తుతం జుబ్లీహిల్స్‌లో ఈ సినిమా షూటింగ్‌ జరుగుతోంది. కాగా ఈ చిత్రం సెట్‌లో మెగాస్టార్‌ చిరంజీవి, జక్కన్న ఎస్‌.ఎస్‌. రాజమౌళి సందడి చేశారు. బుధవారం సెట్‌కు వెళ్లిన వీరిద్దరు యూనిట్‌ సభ్యులతో కాసేపు సరదాగా గడిపినట్లు తెలుస్తోంది. ఈ సందర్భంగా తీసిన ఫొటోలు ప్రస్తుతం సోషల్‌మీడియాలో చక్కర్లు కొడుతున్నాయి.
‘రంగస్థలం 1985’లో సమంత కథానాయికగా నటిస్తున్నారు. అనసూయ, జగపతిబాబు, ఆది పినిశెట్టి ప్రధాన పాత్రలు పోషిస్తున్నారు. మైత్రీ మూవీ మేకర్స్‌ సంస్థ ఈ చిత్రాన్ని నిర్మిస్తోంది. దేవిశ్రీ ప్రసాద్‌ స్వరాలు సమకూరుస్తున్నారు. 1985 నాటి పరిస్థితులు ప్రతిబింబించేలా ఈ చిత్రం కోసం రూ. 5 కోట్లతో సెట్‌ను కూడా వేశారు.
‘మగధీర’ తర్వాత చెర్రీ-జక్కన్న కాంబినేషన్లో మరో చిత్రం వచ్చే అవకాశం ఉన్నట్లు వదంతులు వస్తున్నాయి. ఈ నేపథ్యంలో చెర్రీ సినిమా సెట్‌కు జక్కన్న వెళ్లడం ఆసక్తిని రేకెత్తిస్తోంది.
