బాహుబలి2 సినిమాపై ప్రశంసల జల్లు కురుస్తూనే ఉంది. శుక్రవారం ప్రపంచ వ్యాప్తంగా విడుదలైన బాహుబలి2 ఏకంగా 125 కోట్ల వసూళ్లను రాబట్టి భారతీయ చలనచిత్ర రంగంలో సరికొత్త రికార్డును క్రియేట్ చేసింది. ప్రపంచవ్యాప్తంగా వేలాది స్క్రీన్లపై బాహుబలి-2 ప్రదర్శితమైంది. దేశంలో తెలుగు, తమిళ, మలయాళ, హిందీ భాషల్లో విడుదలైన బాహుహలి2 తెలుగు చలనచిత్ర పరిశ్రమలోనే కాదు భారతీయ సినీరంగ చరిత్రలో మరే చిత్రానికీ సాధ్యం కాని మహాద్బుతాన్ని సృష్టించింది.
ఇక ఈ సినిమాపై ఇప్పటికే ప్రముఖ స్టార్లు ప్రశంసలు కురిపిస్తున్నారు. విజువల్ వండర్, రాజమౌళి సృష్టించిన వెండితెర అద్భుతం ‘బాహుబలి: ది కన్ క్లూజన్’ను పొగడ్తల్లో ముంచెత్తిన ప్రముఖుల్లో మెగాస్టార్ చిరంజీవీ చేరిపోయారు. ఈ చిత్రాన్ని చూసిన చిరంజీవి స్పందిస్తూ, “జయహో రాజమౌళి. బాహుబలి ఒక అద్భుతం. ఇంతటి అద్భుతాన్ని సృష్టించిన రాజమౌళి అభినందనీయుడు.
తెలుగు సత్తాను దేశ విదేశాల్లో చాటిన అద్భుత శిల్పికి హ్యాట్సాఫ్ అంటూ.. సినిమాలో భాగమైన ప్రభాస్, రానా, రమ్యకృష్ణ, అనుష్క, సత్యరాజ్, నాజర్ లకు నా అభినందనలు” అని చిరంజీవి వ్యాఖ్యానించారు. తెరవెనుక ఉన్న విజయేంద్ర ప్రసాద్, కీరవాణి, సెంథిల్ కుమార్, టెక్నికల్ నిపుణులు పడ్డ శ్రమ చిత్రంలో తనకు కనిపించిందని ఆయన అన్నారు.
శుక్రవారం ప్రపంచవ్యాప్తంగా విడుదలైన ‘బాహుబలి-2’ కనెక్షన్ల సునామీ సృష్టిస్తోంది. తొలిరోజే ఏకంగా రూ.125 కోట్లు సాధించి బాక్సాఫీసును షేక్‌ చేస్తోన్న ఈ సినిమా రూ.1000కోట్లు క్రాస్‌ చెయ్యగలదని అంచనా వేస్తున్నారు కొంతమంది సినీ విశ్లేషకులు.
