భారతదేశంలో పిల్లలపై లైంగిక వేధింపులను ప్రోత్సహించే ఇన్స్టాగ్రామ్ ప్రకటనలపై సోషల్ మీడియా దిగ్గజం మెటా నుండి వివరణ కోరుతూ ఆ సంస్థ అధికారులకు సమన్లు జారీ చేయాలని కేంద్ర ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖ అధికారులను కేంద్ర ఐటీ మంత్రి అశ్విని వైష్ణవ్ ఆదేశించారు.
ఇన్స్టాగ్రామ్ భారతదేశంలో చైల్డ్ సెక్సువల్ అబ్యూస్ మెటీరియల్ను ప్రోత్సహించే ప్రకటనలను నడుపుతోందని బ్రిటిష్ బ్రాడ్కాస్టింగ్ కార్పొరేషన్ (BBC) ఒక నివేదికను ప్రచురించిన కొన్ని గంటలకే ఈ పరిణామం చోటుచేసుకుంది. యాప్ యొక్క మోడరేషన్ టెక్నాలజీ ఆమోదించిన తర్వాతే ఈ ప్రకటనలు ఇన్స్టాగ్రామ్లో పబ్లిష్ అవుతున్నాయని ఆ నివేదిక పేర్కొంది.
బీబీసీ వరల్డ్ సర్వీస్ జరిపిన పరిశోధనలో.. ఈ ప్రకటనలలో “రేప్ వీడియో”, “చైల్డ్ వీడియో” వంటి పదాలను ఉపయోగిస్తున్నట్లు తేలింది. ఆ తర్వాత ఇవి వినియోగదారులను టెలిగ్రామ్లోని కొన్ని ఛానెళ్లకు లింక్ చేస్తున్నాయి. అక్కడ వారు కేవలం 99 రూపాయలకే అటువంటి మెటీరియల్ను కొనుగోలు చేయవచ్చు.
ఈ విషయమై బ్రిటిష్ మీడియా సంస్థ మెటాను సంప్రదించగా.. అటువంటి ప్రకటనలను, వాటిని పోస్ట్ చేసిన ఖాతాలను సస్పెండ్ చేశామని, కొన్ని యుఆర్ఎల్ (URL)లను కూడా బ్లాక్ చేశామని తెలిపింది. “ప్రకటనలు లైవ్ అయిన తర్వాత కూడా వాటిని పర్యవేక్షించడానికి మేము ప్రొయాక్టివ్ డిటెక్షన్ టెక్నాలజీని రన్ చేస్తూనే ఉంటాము. మా నిబంధనలను ఉల్లంఘిస్తున్నట్లు భావించే ఏ ప్రకటననైనా ఎవరైనా మాకు రిపోర్ట్ చేయవచ్చు” అని గతంలో ఫేస్బుక్గా పిలవబడే మెటా పేర్కొంది.
మరోవైపు, పిల్లలపై లైంగిక వేధింపులను ప్రోత్సహించే 2.74 లక్షలకు పైగా ఛానెళ్లు, గ్రూపులను 2026లో తాము తొలగించినట్లు టెలిగ్రామ్ తెలిపింది.మెటా సంస్థకు సమన్లు జారీ కావడం ఈ వారంలో ఇది రెండోసారి. ప్రముఖ మెసేజింగ్ యాప్ వాట్సాప్లో ప్రతిపాదిత ‘యూజర్నేమ్’ ఫీచర్పై బుధవారం ఈ సోషల్ మీడియా దిగ్గజానికి సమన్లు జారీ అయ్యాయి. ఈ కొత్త ఫీచర్ ద్వారా “ఐడెంటిటీ స్పూఫింగ్ (వేరొకరిలా నటించడం) మరియు ఫోర్జరీ”కి పాల్పడే అవకాశం ఉందనే ఆందోళనల నేపథ్యంలో మెటాకు ఈ సమన్లు జారీ చేశారు.
ALso Read;SIR పర్యవేక్షణకు ప్రత్యేక కమిటీ: కేటీఆర్